Drita nga Gjilani në saje të goldallimit më të mirë se Prishtina, tani është në krye të tabelës me 36 pikë të mbledhura pas 20 jave në elitën e futbollit. Drita ngadhënjeu me rezultat 1:0 ndaj Llapit nga Podujeva, në ndershjen që u zhvillua në stadiumin “Zahir Pajaziti”. Drita importoi tri pikë, kurse Llapi mbetet pa pikë në vatër të vet, duke zhgënjyer edhe tifozët e saj “Legjendat”. Llapi lëshoi mundësinë e artë që të rikthehet në krye të renditjes, nuk e shfrytëzoi barazimin (0:0) e Prishtinës në Gjakovë me Vëllaznimin. Në minutën e 19-të, Liridon Leci për pak sa nuk shënon, por për fat të keq të tij e për fat të mirë të llapjanëve, tërthorësja e ndali topin. Në minutën e 31-të, Astrit Fazliu del vetëm me portier, por më i suksesshëm doli portieri Beqiri. Golin e fitores e shënoi Xhevdet Shabani pikërisht në minutën e 49-të, duke tronditur vendasit.
Në minutën e 70-të, Drita gati sa dyfishoi epërsinë, por Zeqiri largon topin nga vija e fundore. Pesë minuta pa përfunduar takimi, ndeshja u ndërpre për pak çastet, sepse tifozët “Legjendat” e Llapit dhe “Intelektualët” e Dritës tentuan t’i qërojnë hesapet mes vete, por policia reagoi me kohë dhe u shmang më e keqja. Drita kthehet ballëlart, e cila kryeson me 36 pikë, kurse Llapi bie në vend të tretë me 34 sosh. Në stadiumin e qytetit në Gjilan, sfida mes Gjilanit dhe Lirisë nga Prizreni përfundoi me fitoren e vendasve me rezultat 1:0. Në një terren të rënduar paksa i mbuluar edhe me borë, vendasit fituan me plotë meritë. Në minutën e 90-të, Gëzim Rusi depërtoi nga krahu i majtë e asistoi zhagas kur Armend Thaçi nga rreth 7-8 metra tund portën e Lirisë, 1:0. Gjilani renditet në pozitën e pestë me 32 pikë dhe Liria dy vende më poshtë me 31 sosh.