Cristiano Ronaldo arriti të shënonte edhe një dopietë të premten, në miqësoren kundër Egjiptit. Dy golat e fitores së mbrëmshme për Portugalinë e çuan yllin e Real Madridit në vendin e tretë të listës ndërkombëtare të golashënuesve më të mirë të të gjitha kohërave.
Fituesi i “Topit të Artë” goditi dy herë në kohën e shtesës, teksa kampionët europianë përmbysën disavantazhin e një goli dhe mundën Egjiptin në Cyrih. Goli i parë i Ronaldos e barazoi atë në të njëjtin nivel me ish-yllin japonez, Kunishige Kamamoto, me 80 gola, para se të realizonte të dytin dhe të ecte një hap më përpara. Tani, CR7 është në vendin e tretë të kësaj liste, duke ndjekur vetëm Ferenc Puskas (84 gola, Hungari dhe Spanjë) dhe Ali Daei (109 gola, Iran).
33-vjeçari, i cili ka shënuar 23 gola për klubin dhe kombëtaren në 2018, ka mundësinë ta arrijë edhe Puskas, kur Portugalia të kthehet në veprim kundër Holandës, të hënën.
