Nuk ndalet FSHF-ja; i kërkon Kuvendit dhe policisë ndëshkimin e Erion Braçes!

Futboll

Nuk ndalet FSHF-ja; i kërkon Kuvendit dhe policisë ndëshkimin e Erion Braçes!

Më: 25 prill 2018 Në ora: 17:27
Nuk ndalet FSHF-ja; i kërkon Kuvendit dhe policisë ndëshkimin e Erion Braçes!

Merr nota tragji-komike lufta e FSHF-së ndaj Erion Braçes, si duket në kundërpërgjigje të nismës së deputetit socialist për kontroll tatimor e fiskal në zyrat e qeverisë sonë të futbollit. Një ditë më parë publikoi në faqen e vet zyrtare një deklaratë të Shoqatës së Arbitrave Shqiptarë, duke u identifikuar me “bluzat e zeza”, ndërsa sot i kërkon Byrosë së Kuvendit të Shqipërisë të dënojë ligjvënësin e majtë, që paska thyer ligjet, duke goditur me çakmak nga tribuna e “Selman Stermasit” arbitrin Andi Koçi.

Pjesë e një “donkishotizmi” mediatik ky “akt” i radhës, sepse, duke përfshirë edhe statuset e ditës së të akuzuarit, dihet açik fare se kemi të bëjmë me një luftë “mullinjsh ere”. Sidoqoftë, ankesa, që mban firmën e sekretarit të përgjithshëm Ilir Shulku, i është drejtuar tashmë organit të lartë ligjvënës shqiptar, bashkë me kumtin përkatës të FSHF-së.

Ankesa është depozituar edhe në Komisionin e Shqyrtimit të Kundërvajtjes pranë Policisë së Shtetit. Në të lexohet:

Marrim shkas nga ngjarja e ditës së hënë datë 23.04.2018, kur deputeti socialist z.Erion Braçe, kreu një gjest të shëmtuar në shkallët e stadiumit, duke tentuar të godasë me sende të ndaluara zyrtarët e ndeshjes Partizani – Skënderbeu.

Së pari, veprime të tilla antisportive, vijnë në kundërshtim me parimet e përgjithshme të etikës të parashikuara nga Kodit të Sjelljes së Deputetëve të Republikës së Shqipërisë, pasi nuk e bëjnë deputetin një model për qytetarët dhe nuk nxisin zbatimin e standardeve më të larta të sjelljes për të rinjtë.

Së dyti, çakmaku përbën një send të palejuar në mjediset sportive sipas nenit 49 të Ligjit 79/2017 “Për Sportin” dhe konform nenit 55 të këtij ligji, shkelja e dispozitës së sipërcituar përbën kundërvajtje administrative dhe dënohet me gjobë nga dhjetëmijë deri në pesëdhjetëmijë lekë e cila vendoset nga Komisioni i Shqyrtimit të Kundërvajtjeve Administrative pranë komisariatit të policisë vendore.

Federata Shqiptare e Futbollit, si organi kompetent për organizimin e sportit të futbollit në vend, ka për detyrë të marrë masa për parandalimin e dhunës duke promovuar sportin e pastër dhe tolerancën. Në këtë kuptim sjellja e deputetit është publikisht e dënueshme dhe kërkojmë të mbahet parasysh nga Këshilli për Rregulloren, Mandatet dhe Imunitetin në kuadër të vlerësimit të plotë të standardeve etike të miratuara dhe për ndikimin që këto standarde kanë pasur në punën politike të deputetit.

Rasti i deputetit Braçe nuk është i izoluar, kujtojmë se edhe në të shkuarën, deputetë të të gjitha forcave politike kanë shkaktuar incidente të panevojshme në shkallët e stadiumeve, duke i kthyer ato në “kredit” politik.

Bazuar në sa më sipër, kërkojmë nga Komisionit të Shqyrtimit të Kundërvajtjes pranë Policisë së Shtetit, procedimin administrativ ndaj deputetit Erion Braçe.
Me konsideratë;
Sekretari i Përgjithshëm
Ilir Shulku.

Sot mund të lexoni Shfletoni kopertinat