Më shumë se sa fitorja e tretë radhazi e Champions League nga ana e Real Madrid (mundi 3-1 Liverpool), lajmi kryesor pas takimit final ishte deklarata e Cristiano Ronaldo, që tha: “Ishte diçka e bukur të luaja me Real Madrid”, duke lënë të hapur mundësinë e një largimi nga skuadra “merengues”.
Presidenti i Realit, Florentino Perez, nuk e ka pritur mirë këtë deklaratë, duke thënë: “Të gjithë kanë të drejtën të flasin dhe të thonë atë që mendojnë. Por për një skuadër si Real Madrid rëndësi nuk ka individi, por klubi. I rëndësishëm mbetet klubi dhe në një ditë si kjo, që ne u shpallëm kampionë të Europës, gjëja më e rëndësishme është te festojmë trofeun”, tha Perez.
Më tej, numri 1 i Real Madrid, shtoi: “Nuk është hera e parë që ndodh kjo gjë. Gjithnjë flasim për Ronaldon dhe më pas nuk ndodh asgjë. Jam i lumtur që ai ka fituar 5 herë trofeun e Champions League”. Ndërsa kapiteni Sergio ramos, tha: “Nëse ka ndonjë gjë pas kësaj deklarate, duhet ta sqarojë sa më shpejt. Nuk ka për të gjetur diçka më të mirë se Reali”.
