Ndeshja kthyese e raundit të parë të UEFA Europa League ndërmjet Prishtinës dhe Fola të Luksemburgut (0:0) zhvillohet nesër, e enjte 19 korrik, nga ora 19:00 në stadiumin “Adem Jashari”.
Ndërsa, dy skuadrat sot kanë mbajtur seancat e fundit stërvitore para përballjes së nesërme. Skuadra e Prishtinës nuk ka qenë komplete, sepse Januzi ka qenë i detyruar të pushoj pas një lëndimi që ka pësuar nga ngarkesa dhe vetëm nesër mund të shihet se a do të mund të startoj apo jo, nëse jo vendin e tij do të zë Alen Jasharoski ndërsa nuk pritet të ketë shumë ndryshime në formacionin bardhekaltër çka megjithatë do të dihet vetëm disa orë para ndeshjes.
Përndryshe fusha e stadiumit “Adem Jashari” nuk është e përkryer dhe mjaft e rënduar pas reshjeve të fundit të shiut.
Pamje nga seanca stërvitore: Ndërsa pas seancës stërvitore, kryetrajneri Mirel Josa dhe Armend Dallku në konferencën e organizuar brenda ambienteve të stadiumit iu kanë drejtuar publikut nëpërmjet gazetarëve.
Edhe kryetrajneri Josa edhe kapiteni Dallku, sikurse në tre ndeshjet tjera paraprake kanë shprehur rezervat e tyre dhe duke qëndruar me këmbë në tokë janë shprehur se ndeshja do të jetë shumë më e vështirë se që presin adhuruesit dhe mbarë publiku.
