Opinionisti Abdulla Mehmeti, përmes një shkrimi të dërguar në redaksinë e gazetës “Bota sot”, ka kujtuar masakrën e Gostivarit, që ndodhi 20 vite më parë.
Mehmeti në shkrimin e tij ka pyetur se pse nuk janë ndërmarr masa të nevojshme kundër ndërhyrjes së njësive speciale të policisë serbe, “përkrah atyre vendëse, të cilat zbarkuan atë ditë në Gostivar për t’i përgjakur shqiptarët”, përcjell Bota sot.
Më poshtë mund të lexoni shkrimin e tij të plotë:
20 vjet nga masakra e Gostivarit, 9 korrik 1997
(9 korrik 1997 - 2017)
9 Korriku 1997 – Është dita kur pushteti i Maqedonisë, 6 vjet pas pavarësisë së shtetit, masakroi qytetarë të pafajshëm shqiptarë në qytetin e Gostivarit (3 të vrarë, 135 të plagosur, qindra qytetarë të arrestuar, mes të cilëve edhe kryetari i Komunës së Gostivarit dhe kryetari i Këshillit të kësaj komune, si dhe udhëheqësit e Komunës së Tetovës), ndërsa përfaqësuesit politik të kësaj popullate, me naivitetin e tyre ndihmuan në krijimin e pretekstit për realizimin e këtij plani armiqësor të pushtetit ndaj shqiptarëve.
Si ndodhi që të mos përmendet (sa dhe si duhet) dhe të mos ndërmerren masa të nevojshme kundër ndërhyrjes së njësive speciale të policisë serbe, përkrah atyre vendëse, të cilat zbarkuan atë ditë në Gostivar për t’i përgjakur shqiptarët?!
Si ndodhi që Ligji për përdorimin e flamurit shqiptar, në komunat me shumicë të banorëve shqiptarë, i sjellë që në vitin 1973 nga pushteti komunist, të pezullohet me një vendim politik në periudhën e pluralizmit, kur në pushtetin e këtij vendi ishin ulur këmbëkryq edhe përfaqësuesit e partive politike të shqiptarëve, në nivel qendror dhe lokal?!
Si ndodhi që populli shqiptar të vritet e masakrohet, jo vetëm në Gostivar, por disa herë dhe gjithandej në vendbanimet shqiptare në Maqedoni, ndërsa të njëjtët politikanë e vazhduan edhe më tej qeverisjen e vendit me partnerët e njëjtë politik maqedonas, fajtorë për vrasjen e shqiptarëve, pa asnjë kusht, sikur asgjë të mos ketë ndodhur deri më sot?!/BS
