Disa herë nervozizmi nuk prodhon asgjë të mirë. Disa herë thonë duhet të numërosh deri në dhjetë derisa të veprosh. Hendbollistja e Kastriotit nga Ferizaj, Sara Misini, me 7 mars të këtij viti akuzoi kryetarin e klubit Faton Haxhisalihu, se ia ka dy paga borxh dhe nuk ia ka hequr edhe shpenzimet e mjekimit. Kështu që Sara kishte thënë se ka marrë fund Kastrioti për të. “Prej që ai u emërua kryetar vetëm nga një rrogë e kemi marrë, dhe mbi të gjitha gjatë përgatitjeve pësova një lëndim në këmbë dhe të gjitha shpenzimet i kam kryer vet pa ndihmën e klubit”, kështu kishte thënë mes të tjera Sara. Ndërkaq, Haxhisalihu po me 7 mars iu kishte kundërpërgjigjur mes të tjera: “Lëndimet e tyre, mos stërvitjet, mospërgjegjësia ndaj klubit, mos sjellja korrekte e saj ndaj referëve, kemi marrë gjoba. Sara është e manipuluar nga të tjerët se vetëm aty e kanë gjetur një pikë të dobët. Unë drejtpërdrejtë nuk kam qenë i kënaqur në bazë të sjelljeve të saja”. Deklaruan çfarë deklaruan, akuzuan çfarë akuzuan, e mira prej të mirës është se pakënaqësitë, mospajtimet i tejkaluan për dy ditë. Ajo që duhet theksuar se me 7 mars me gjithë akuzat Haxhisalihu e kishte ftuar Sarën t’i kthehet klubit, premtim të cilin e mbajti dhe tregoi se di të falë e nuk mban inati. “Ngaqë kishim disa mosmarrëveshje, por ramë dakord, gjetëm një gjuhë të përbashkët si me parë, respekt për Sarën dhe të gjitha lojtaret”, tha Haxhasalihu.
