Kush ishim, kush jemi dhe pse jemi rënë kaq poshtë. Disa herë shtrohet pyetja e qytetarëve të Ferizajt që marrin vesh fortë mirë në hendboll dhe faktikisht është qytet që ka traditë këtë sport. Kur tempulli i hendbollit është përtokë çfarë presim nga të tjerët! Liga e hendbollit është rënë përtokë, mungon cilësia, shikueshmëria ka ikë! Besa Fam Gas nga Peja në vitet e fundit sundon pa asnjë problem ligën. Ish portieri i gjeneratë së artë, Skënder Sahiti, kësaj radhe ka goditur me gjuhën më të ashpër të mundshme ish klubin e tij, Kastriotin e Ferizajt. Ai ka marrë një shembull interesant të një gare të qenve që ishte zhvilluar në Brod dhe kishte parë me mijëra shikues, kurse kur kishte shkuar në hendboll, palestrën e kishte parë me mbi 100 sosh, madje ishte derbi i kampionatit! Sipas tij, më atraktiv tani u bë gara e qenve se sa një derbi i hendbollit qoftë të meshkujt qoftë të femrat.
Kështu kur bie cilësia! “Kacafytje e qenve ka më shumë shikues se sa hendbolli ferizajas. Kastrioti u mbet jetim, pa asnjë mbikëqyrje. Jo vetëm Kastrioti por të gjitha klubet duhet të zgjohen prej gjumit, se nuk shkon kohë e largët, mund të vjen në pikëpyetje ekzistenca e këtij sporti. Hera e parë që Kastrioti nuk futet në Evropë, kur dihet nami i saj dhe e gjithë Kosova një kohë është mburr me ta.
Në Evropë nuk kanë hyrë, se me shumë janë marrë me thashetheme dhe me bojkote, se sa që iu ka interesuar. E godas Kastriotin për arsye se është klub që u desh të jetë shembull, fuqi rajonale dhe jo të qeshin të tjerët me ta. Sepse unë si portier i takoi gjeneratës së artë, që sot disa që janë në hendboll, atëkohë veç biletë kanë mundur me ble dhe me na shikuar”, tha Sahiti për gazetën kombëtare “Bota sot".