Përkthyesi gjerman për gjuhën shqipe, Manuel Cebulla, kandidon për deputet

Të dielën me 7 qershor do të mbahen zgjedhjet për Parlamentin Evropian në Gjermani. Për herë të parë paraqitet një organizatë e re politike në Gjermani me emrin Europa – Demokratie – Esperanto (Evropë – Demokraci – Esperanto), shkurt: EDE. Kryetari i shoqatës është Manuel Cebulla nga qyteti Essen i Gjermanisë. Ai njihet në diasporën shqiptare në Gjermani si përkthyes për gjuhën shqipe dhe njeri i angazhuar prej vitesh për Shqipërinë dhe Kosovën.

Në Evropë mungon dialogu demokratik

Manuel Cebulla kandidon për EDE-n së bashku me të vetmin fitues gjerman të Çmimit Nobel për ekonominë, profesor Reinhard Selten. EDE qëndron jashtë spektrit politik dhe nuk është as e majtë as e djathtë. Synimi kryesor i EDE-s është zhvillimi i mëtejshëm i Evropës së bashkuar për të siguruar paqen dhe prosperitetin e qëndrueshëm për të gjithë evropianët. Kjo, sipas EDE, mund të arrihet vetëm duke demokratizuar Bashkimin Evropian. Faktikisht BE-ja nuk është demokratike, sepse ligjet e BE-së nuk bëhen nga Parlamenti, por nga qeveritë e shteteve anëtare.

EDE-ja propozon gjuhën ndërkombëtare Esperanto si mjet komunikues midis evropianëve. Esperanto është një gjuhë 120-vjeçare e përhapur në gjithë botën dhe me disa milionë folës aktivë, e cila mund të mësohet disa herë më lehtë dhe më shpejt se sa ndonjë gjuhë kombëtare, megjithëse është një gjuhë e larmishme dhe e përdorueshme në të gjitha sferat e jetës, siç dëfton p.sh. përdorimi i gjërë i Esperantos në internet. Esperanto mund të shërbejë si gjuhë midis evropianëve të lirë dhe të barabartë. Por EDE nuk do që Esperanto t'i zëvendësojë gjuhët e tjera, në të kundërtën EDE angazhohet për mbrojtjen dhe përkrahjen e të gjitha gjuhëve dhe kulturave të Evropës.

EDE, siç thotë Cebulla, angazhohet jo vetëm në fushën e komunikimit dhe të dialogut, por edhe në fusha të tjera. Kështu EDE kërkon që qytetarët të informohen objektivisht dhe në mënyrë të gjithanshme që të kenë mundësi të mirëfilltë për të marrë vendime për veten e tyre, dhe që t'ju mundësohet qytetarëve të marrin pjesë aktivisht në marrjen e vendimeve të përbashkëta, p.sh. me anë të referendumeve, dhe që vendimet e qeverive dhe veprimet e administratave të jenë sa më transparente. EDE dëshiron po ashtu që të debatohet mbi çështjet e rëndësishme me sinqeritet duke thënë se kush qëndron prapa propozimeve, kush i përkrah ato, sa kushton realizimi dhe sa fitim do të ketë dhe kush janë ata që përfitojnë dhe kush do të humbë.

Shqiptarët e kanë vendin me plotë të drejtë në qendër të Evropës

Pyetur mbi qëndrimin e tij ndaj së ardhmes evropiane të Shqipërisë dhe të Kosovës, kandidati i EDE-s, Manuel Cebulla, thotë: „Unë do të përkrah anëtarësimin e të dyja vendeve në BE si dhe në NATO, nëse shumica e popullsisë në Kosovoë dhe Shqipëri e dëshiron anëtarësimin. Shqiptarët janë popull evropian dhe janë properëndimor. Vendin e kanë me plotë të drejtë në qendër të Evropës. Anëtarësimi i Shqipërisë në NATO është një sukses i madh që hap shumë perspektiva të mira për Shqipërinë dhe edhe për Kosovën, dhe tregon që shqiptarët nuk janë vetëm popull punëtor, por edhe që duan dhe mund të marrin përsipër përgjegjësi ndërkombëtare.“

Lidhur me rolin e BE-së në Kosovë, Cebulla thotë se „duhet pyetur dhe vlerësuar se politikën e kujt bën BE-ja aktualisht në Kosovë. Shqiptarët nuk kanë nevojë për mbikëqyrës njerkë, por për miq të vërtetë. Roli i BE-së në Kosovë me siguri duhet dhe edhe do të ndryshojë. Por për këtë duhet bërë më shumë reklamë pozitive për shqiptarët, Kosovën dhe Shqipërinë, sepse politikanë të partive të ndryshme dhe gazetarë të mediave të ndryshme në vendet e BE-së kanë akoma mendime të gabuara. Shpresoj, vazhdon Manuel Cebulla, që në Parlamentin Evropian të mund të jap një kontribut për promovimin e çështjes shqiptare. Prandaj u bëj thirrje të gjithë shqiptarëve me shtetësi gjermane të shkojnë në votim me 7 qershor dhe të vëjnë kryqin tek EDE.“

Kthehu | 06.06.2009