Qeveria rrit pensionet për të gjitha kategoritë - Bota Sot
Qeveria rrit pensionet për të gjitha kategoritë

Kosova

E shtunë, 27 gusht 2016

Qeveria rrit pensionet për të gjitha kategoritë

Më: 4 tetor 2012 Në ora: 16:38

Nën drejtimin e Kryeministrit Hashim Thaçi, Qeveria e Republikës së Kosovës ka zhvilluar mbledhjen e vet të rregullt, në të cilën ka miratuar projektligje, rregullore dhe vendime nga fushat e veta të përgjegjësive kushtetuese dhe ligjore.

Në hapje të mbledhjes, kryeministri Hashim Thaçi ka prezantuar para kabinetit qeveritar vendimin e Qeverisë së Republikës së Kosovës për rritjen e pensioneve për të gjitha kategoritë e pensionistëve në Republikën e Kosovës.

Kryeministri ka theksuar se ky është vazhdim i angazhimeve të kabinetit qeveritar për të përmirësuar pozitën sociale dhe materiale të të gjitha kategorive përfituese nga buxheti i Kosovës, duke përkujtuar rritjen e pagave të arsimtarëve, shërbyesve civil, punëtorëve shëndetësorë, pjesëtarëve të policisë dhe të punësuarve tjerë që përfitojnë paga nga buxheti i Kosovës.

“Me këtë vendim kemi përmirësuar standardin jetësor për të gjithë këta të punësuar që paguhen nga buxheti i shtetit, dhe njëkohësisht bëmë hap të madh që pagat e tyre të jenë të dinjitetshme, dhe tani kemi arritur nivelin e mesatares së pagave të vendeve në rajon” ka thënë kryeministri Hashim Thaçi dhe ka vazhduar se “e gjithë kjo do të ishte e pamjaftueshme sikur sot të mos merrnim edhe vendimin për rritjen e pensioneve”.

Sipas vendimit të Qeverisë së Republikës së Kosovës, për pensionistët kontribut pagues pensioni rritet për 40 për qind. 26.45 për qind e rritjes do t’iu paguhet nga janari 2012 ndërsa pjesa tjetër nga janari 2013.

Pensionet bazë, do të rriten në vlerë prej 33.3 për qind. 11.1 për qind e rritjes do t’u paguhet shfrytëzuesve që nga 1 janari 2012, kurse lartësia tjetër e rritjes do t’iu paguhet që nga janari 2013.

Edhe pensionet e aftësisë së kufizuar do të rriten në lartësi prej 33.3 për qind. 11.1 për qind e kësaj rritje do t’u paguhet shfrytëzuesve që nga 1 janari 2012, kurse lartësia tjetër e rritjes do t’iu paguhet që nga janari 2013.

Nga kjo rritje e pensioneve do të përfitojnë 164 mijë e 200 pensionistë. 112 mijë përfitues të pensioneve bazë, 35 mijë pensione kontributdhënëse dhe 17 mijë 200 përfitues të pensioneve për aftësi të kufizuar.

“Kjo rritje e pensioneve është ndërmarrë gjatë përgatitjes së procesit buxhetor, si dhe pas analizave të detajuara me Ministrinë e Financave dhe Ministrinë e Punës dhe Mirëqenies Sociale, dhe duke mos rrezikuar fare qëndrueshmërinë buxhetore dhe stabilitetin financiar të vendit” ka thënë kryeministri Thaçi.

Kryeministri Hashim Thaçi ka shprehur mirënjohjen dhe falënderimin për kontributin e madh që e kanë dhënë gjeneratat e pensionistëve gjatë dekadave të tëra për zhvillimin e vendit, në të gjitha etapat e tij.

Në mbledhje kabineti qeveritar ka aprovuar edhe Projektligjin për Agjencinë e Regjistrimit Civil dhe Projektligjin për Zonat Ekonomike.

Duke vazhduar punën për kompletimin akteve nënligjore për zbatimin e Ligjit për Shërbimin Civil, Qeveria ka miratuar sot Rregulloren për Punën Vullnetare të Nëpunësve Civil pas Pensionimit dhe Rregulloren për Avancim në Karrierë të Nëpunësve Civil.

Qeveria e Kosovës ka miratuar edhe Rregulloren për Përcaktimin e Kualifikimeve të Veçanta, Shpërblimin dhe Kompensimin dhe për Procedurat e Licencimit të Administratorëve Falimentues.

Në mbledhje është aprovuar edhe Strategjia kundër Falsifikimit dhe Piraterisë si dhe vendimin për emërimin e Komisionit për Ndihmë Shtetërore.

Me kërkesë të Ministrisë së Shëndetësisë, Qeveria ka aprovuar vendimin për ndarjen e 200.000 euro për trajtimet mjekësore jashtë institucioneve publike shëndetësore.

Është miratuar edhe Rregullorja për Komisionin Qeveritar për njohjen dhe verifikimin e statusit të dëshmorëve të kombit, invalidit, veteranit, pjesëtarit apo të internuarit të Ushtrisë Çlirimtare të Kosovës. BS

Komentet
comments powered by Disqus
Sot mund të lexoni Shfletoni kopertinat
Sondazh Kush ka të drejtë dhe çfarë duhet të bëj Qeveria me demarkacionin me Malin e Zi?

    Kuvendi duhet ta votojë marrëveshjen për demarkacion me Malin e Zi

    Qeveria duhet ta rishikoj marrëveshjen

    Opozita ka të drejtë që po kundërshton demarkacionin

    Qeveria ka të drejtë për demarkacionin

    Nuk duhet të votohet marrveshja, sepse me demarkacion Kosova humbë tokë

    Shiko rezultatet
test