Mocioni për pezullimin e privatizimit ka ngritur pyetjen se kush në të vërtetë është pozitë dhe kush opozitë në Kuvend, thonë zyrtarë opozitarë. Qëndrimi i Aleancës për Ardhmërinë e Kosovës për të abstenuar rreth mocionit për pezullimin e privatizimit në Kosovë i ka hapur rrugë Qeverisë drejt privatizimit, thotë Visar Ymeri nga “Vetëvendosje”. Sipas tij, fatkeqësisht sa herë që ka nevojë Hashim Thaçi, po gjen paterica të reja në radhët e opozitës për të vazhduar jetën e vet në pushtet. Pro opozitës kanë dalë edhe dy deputetët e tjerë të Koalicionit për Kosovë të Re, që janë pjesë e koalicionit, Muhamet Mustafa dhe Amir Ahmeti. Muhamet Mustafa ka thënë Qeveria këtë nuk duhet ta konsiderojë si fitore. Nga ana tjetër, Ismet Beqiri, shef i Grupit parlamentar të LDK-së, beson se deputetët e kësaj partie kanë votuar atë që është e drejtë dhe do t’i përmbahen vendimit. Ndërsa anëtarët e Grupit parlamentar të AAK-së nuk kanë pranuar të flisnin për KTV-në, duke thënë së kjo temë është e mbyllur për AAK-në.
