(I plotësuar) Ministri Bajram Rexhepi i është përgjigjur thirrjeve të kryeparlamentarit Jakup Krasniqi për të dhënë dorëheqje duke i thënë se ai ishte i vonë në Ushtrinë Çlirimtare të Kosovës (UÇK).
Dallimet Brenda Partisë Demokratike të Kosovës (PDK) në pushtet janë thelluar të enjten pas polemikave në Parlamentin e vendit.
Kryeparlamentari Jakup Krasniqi e ka bërë përgjegjës Ministrin e Brendshëm Bajram Rexhepi për “rrethim të Parlamentit” me policë.
Krasniqi ia ka ndërprerë më vonë fjalën Rexhepit kur ai filloi të fliste në sallën e Parlamentit duke nisur me “Kryetari i Kuvendit e ka keqpërdorur pozitën e tij…”.
Në shenjë proteste, ish-Kryeministri Rexhepi që vjen nga partia e njëjtë me Krasniqin, ka dalë jashtë seancës.
“Udha e mbarë të qoftë”, i ka thënë Krasniqi, duke i treguar se ai është shefi i Kuvendit. Më pas Krasniqi i ka thënë Adem Grabovcit, shefit të grupit parlamentar të PDK-së, “kështu e keni kur sillni ministra rrugaçë”.
Krasniqi shtoi se Rexhepi do të duhej të ofronte dorëheqjen e tij në Parlament për shkak të veprimeve të policisë.
Më vonë gjatë ditës, Rexhepi ka mbajtur konferencë për gazetarë në të cilën ka thënë se nuk do të japë dorëheqje, se këtë mund t’ia kërkojë vetëm Kryeministri dhe se Krasniqi është afruar me parti të caktuara opozitare.
“Po ashtu Krasniqi ka qenë i vonë në UÇK, ka hyrë diku në fund të 1998-tës. Unë kam qenë aty që në fund të 1996-tës”, ka thënë Rexhepi.
Krasniqi Grabovcit: Mos emëroni ministra rrugaç
Rifillimi i pasdites i seancës së sotme të Parlamentit të Kosovës përfundoi ende pa filluar mirë. Për fjalë u paraqit së pari ministri i Punëve të Brendshme, Bajram Rexhepi, i cili filloi me sulme kundër kryeparlamentarit Jakup Krasniqi. Ky pastaj urdhëroi regjinë që t’ia ndërpresë mikrofonin, gjë që edhe u bë. Pas këmbimit të fjalëve midis këtyre dyve, ndërhyri edhe kreu i grupit parlamentar të PD-së, Adem Grabovci, i cili “falënderoi” Krasniqin për qasjen e tillë ndaj ministrit Rexhepi dhe PDK-së. Krasniqi iu përgjigj që PDK-ja duhet të kujdeset që të mos emërojë ministra rrugaçë. Pas edhe një ndërhyrje nga ulësja e deputetit Grabovci, Krasniqi iu përgjigj me fjalët: mblidhi 80 nënshkrime dhe më shkarkoni nga posti i kryetarit të Kuvendit. Pas këtyre fjalëve, deputetët e PDK-së filluan të braktisin punimet e seancës, kurse Krasniqi shpalli përfundimin e seancës dhe vazhdimin e saj ditën e premte.
* * * * *
Krasniqi: Kosova s’ka nevojë për shtet policor (Video)
- Kuvendi i Kosovës rifilloi seancën pas ndërprerjes një orëshe të punës. Kryetari i Kuvendit të Kosovës, Jakup Krasniqi kërkoi që të largohet Policia e Kosovës nga rrethojat e Kuvendit.
Ai kritikoi ashpër Ministrin e Punëve të Brendshme, Bajram Rexhepi për mënyrën se si është sjellë një ditë më parë me protestuesit. Krasniqi, porositi Rexhepin se nuk është ai që e bën drejtësinë në vend.
Komenti i tij vjen një ditë pas përplasjeve ndërmjet aktivistëve të Lëvizjes Vetëvendosje dhe pjesëtarëve të njësive speciale të Policisë së Kosovës para ndërtesës së qeverisë.
* * * * *
Kuvendi i Kosovës po vazhdon punimet pas një shtyrje diku një orëshe për shkak të pranisë së policëve brenda hapësirave të Kuvendit.
Kërkesën për largimin e policëve e bëri kryetari i Kuvendit të Kosovës, Jakup Krasniqi, i cili në fillim të seancës tha se nuk janë respektuar rregullat procedurale meqë nuk është kërkuar leje nga ai.
Krasniqi tha se nuk ka informata se kush i ka urdhëruar policët të qëndrojnë sot në Kuvend, por theksoi se ministrat nuk mund të japin urdhra të tillë pa respektuar rregullat.
“Ky vend nuk ka nevojë për dhunë policore, as forcë policore e as shtet policor. Ky vend ka nevojë për drejtësi dhe drejtësinë nuk e bën Bajram Rexhepi që dëshiron ta burgos edhe presidentin, edhe kryetarin e Parlamentin dhe krejt. Kush ia dha atë të drejtë?”, tha ai.
Komenti i tij vjen një ditë pas përplasjeve ndërmjet aktivistëve të Lëvizjes Vetëvendosje dhe pjesëtarëve të njësive speciale të Policisë së Kosovës para ndërtesës së qeverisë.
Protesta e lëvizjes kundër privatizimit të Distribucionit dhe Furnizimit me Energji Elektrike (KEDS) rezultoi me disa persona të lënduar e të arrestuar.
Urdhri për ndërhyrjen e policisë dhe largimin edhe të deputetëve të Vetëvendosjes u dha një ditë më parë nga vet ministri i brendshëm, Bajram Rexhepi.
Në rend të ditës se seancës së sotme është dhe shqyrtimi i Propozim-Rezolutës për normalizimin e marrëdhënieve ndërmjet Republikës së Kosovës dhe Republikës së Serbisë.
* * * * *
Seanca e Kuvendit të Kosovës është shtyrë për shkak të pranisë së policëve brenda hapësirave të Kuvendit.
Kryetari i Kuvendit të Kosovës, Jakup Krasniqi, kërkoi largimin e menjëhershëm të pjesëtarëve të policisë nga objekti i legjislativit të vendit duke thënë se nuk janë respektuar rregullat procedurale meqë nuk është kërkuar leje nga ai.
“Kërkoj nga kabineti qeveritar-kryeministri dhe ministri mos t’i keqpërdorin ata djem dhe vajza që janë për ta mbrojtur demokracinë, lirinë dhe dinjitetin e vet dhe dinjitetin e institucionit të Kosovës- të mos i përdorim për interesa private të askujt”, u shpreh Krasniqi.
Komenti i tij vjen një ditë pas përplasjeve ndërmjet aktivistëve të lëvizjes “Vetëvendosje” dhe pjesëtarëve të njësive speciale të Policisë së Kosovës para ndërtesës së qeverisë.
Protesta e lëvizjes kundër privatizimit të Distribucionit dhe Furnizimit me Energji Elektrike (KEDS) rezultoi me disa persona të lënduar e të arrestuar.
Urdhri për ndërhyrjen e policisë dhe largimin edhe të deputetëve të “Vetëvendosjes” u dha një ditë më parë nga vet ministri i brendshëm, Bajram Rexhepi.
Krasniqi tha se nuk ka informata se kush i ka urdhëruar policët të qëndrojnë sot në Kuvend, por theksoi se ministrat nuk mund të japin urdhra të tillë pa respektuar rregullat.
“Ky vend nuk ka nevojë për dhunë policore, as forcë policore e as shtet policor. Ky vend ka nevojë për drejtësi dhe drejtësinë nuk e bën Bajram Rexhepi që dëshiron ta burgos edhe presidentin, edhe kryetarin e Parlamentin dhe krejt. Kush ja dha atë të drejtë”?
Seanca pritet të vazhdojë punimet në orën 11, ndërsa në rend të ditës do ta ketë debatin për projekt-rezolutën e Partisë Demokratike të Kosovës për normalizimin e marrëdhënieve në mes të Kosovës e Serbisë.
