Kryetari i Lëvizjes Vetëvendosje!, Visar Ymeri, ka kritikuar zëvendëskryeministrin, njëherësh ministër i Punëve të Jashtme, Hashim Thaçin, për mospranimin e Kosovës në UNESCO.
Ymeri në profilin e tij në “Facebook” ka shkruar se dështimi për t’u anëtarësuar në UNESCO do të na ndjekë, neve si shtet, për një kohë të gjatë. “Ka shumë faktorë që e kanë kushtëzuar këtë dështim. Kryesori nga ta lidhet me Hashim Thaçin, me paaftësinë, sharlatanizmin e ambicien e tij të sëmurë personale”, ka shkruar Ymeri.
Ai ka thënë se Thaçi është sjellë karshi konferencës së UNESCO-s sikur aty shefa të shefave të ishin Adem Grabovci e Ismet Beqiri, të cilët i “sjell e i pështjell”.
Postimi i plotë i Visar Ymerit:
Dështimi për t’u anëtarësuar në UNESCO do të na ndjekë, neve si shtet, për një kohë të gjatë. Përgjegjësia e drejtpërdrejtë politike bie mbi Hashim Thaçin, tash ministër i Jashtëm, kohë më parë kryeministër i Republikës.
Ka shumë faktorë që e kanë kushtëzuar këtë dështim. Kryesori nga ta lidhet me Hashim Thaçin, me paaftësinë, sharlatanizmin e ambicien e tij të sëmurë personale.
Dështimi për sigurimin e votave, madje edhe të shteteve që na kanë njohur, nuk do koment. Aq më i rëndë është fakti kur tri vende, Japonia, Polonia e Koreja e Jugut, të cilat abstenuan, janë njëkohësisht shtete të cilat nuk kanë ngurruar fare ta njohin Kosovën dhe në të cilat ndikimi diplomatik i ShBA-së është jashtëzakonisht i madh. Si dështoi Thaçi t’i sigurojë të paktën këto vota PËR? Apo edhe këto na qenkan vende diktatoriale!?
Procesi nuk duket të ketë qenë i mbështetur, ashtu siç po thuhet, nga shtetet e Quintit që nga fillimi i tij.
Fushata ka qenë e orientuar kah diplomacia publike e jo kah ajo klasike, për qëllime promovimi personal të Hashim Thaçit e të Petrit Selimit, e që rezultoi në fund me disfatë të madhe. Ajo është udhëhequr si ndërmarrje private e Hashim Thaçit. Ndërkohë që tash dështimin po do t’ia faturojë tërë Republikës së Kosovës.
Fushata e Hashim Thaçit e Petrit Selimit nuk e ka respektuar fare parimin e konfindencialitetit dhe heshtjes duke bërë shumë bujë e tepër shumë reklamë personale nëpër rrjetet sociale e faqen e internetit të MPJ-së, gjë që e ka dëmtuar shumë procesin e lobimit.
Hashim Thaçi është sjellë karshi konferencës së UNESCO-s sikur aty shefa të shefave të ishin Adem Grabovci e Ismet Beqiri, të cilët i “sjell e i pështjell”. Por ja që kjo sjellje e pështjellje e Hashim Thaçit po u kushtojnë shumë shtrenjtë Republikës së Kosovës dhe qytetarëve të kësaj Republike.
Nuk mund të shpëtohet edhe Thaçi edhe Republika. Ne duhet ta shpëtojmë Republikën. Prandaj Thaçi duhet të dorëhiqet.
