Lidhja Demokratike e Kosovë sot ka mbajtur tubimin përmbyllës në Vrellë të Istogut, me që rast u tha se fitorja e këtij subjekti në Istog dëshmon fitoren e LDK-së në gjithë Kosovën.
Deputeti i LDK-së, Lumir Abdixhiku tha se ata që kanë provuar me vjedh votën e LDK-së në Istog, kanë tentuar me vjedh edhe shtetin. Abdixhiku foli edhe për projekte të shumta që i kanë në plan për Komunën e Istogut, duke theksuar se në Komisionin për Buxhet dhe Financa, Haki Rugova i ka dërguar 11 projekte, ndër të cilat është edhe një për fshatin Vrellë.
Abdixhiku: Ata që kanë tentuar me i vjedh votat kanë provu me vjedh shtetin
"Ata që kanë tentuar me vjedh votën e juaj kanë provuar me vjedh krejt shtetin dhe ne të njëjtëve duhet më iu thanë mjaftë të dielën. Më thatë që kundërkandidati është i Vrellës, unë po ua jap një përvojë të sotshme në Komision për Buxhet dhe Financa, kryetari i tanishëm i ka dërguar 11 projekte të reja për Istogun, kundërkandidati i tij zero, asnjë, dhe njëri prej projekteve është për Vrellë dhe atë e kemi aprovuar edhe sot”, tha ai.
Ai ia kumtoi lajmin kandidatit Haki Rugovës, se projekti për ndërtimin e Sheshit "Ibrahim Rugova" ka kaluar në buxhet.
Ndërsa, kandidati i LDK-së për kryetar të Istogut, Haki Rugova duke qenë i bindur në fitoren e tij për të tretën herë me radhë, tha se vota e tij u vodh më 19 nëntor.
Ai fitore të fuqishme kërkoi nga bashkëqytetarët e tij në Vrellë, të cilën e konsideroi si prirëse e të gjithë rrugëtimit të Lidhjes Demokratike të Kosovës.
Rugova: Pres që Vrella të kthehet në bastionin e Istogut
"Gjithmonë Vrella në historinë e LDK-së dhe Ibrahim Rugovës, gjithmonë Vrella ka qenë prijëtare e të gjitha proceseve në të gjitha periudhat....Pres që përsëri Vrella të kthehet dhe të bëhet pjesë e bastionit që ka Istogu edhe dua që Vrella pikërisht të jetë ai kulmi i vlerave të Lidhjes Demokratike këto, çfarë i ka pasur në të gjitha periudhat", tha ai.
Rugova ftoi të gjithë të dalin të dielën të votojnë dhe të tregojnë unanimitetin që ka LDK.
Për të mbështetur kandidaturën e Haki Rugovës, të pranishëm në këtë tubim përmbyllës zgjedhor ishin edhe, Gazmend Muhaxheri, Xhafer Tahiri, Agim Veliu dhe deputetët, Vjosa Osmani, Besa Gaxherri, Driton Selmanaj, Avdullah Hoti, Anton Çuni.
