Edhe shofer i kryetarit të Komunës edhe asamblist

Kosova

Edhe shofer i kryetarit të Komunës edhe asamblist

Më: 12 shkurt 2018 Në ora: 20:06
Kryetari i Komunës së Vitisë, Sokol Haliti

Kryetari i Komunës së Vitisë, Sokol Haliti, ka zgjedhur për vozitës bashkëpartiakun e tij, Afrim Ramushi.

Përveç si shofer i kryetarit, Ramushi ka edhe një detyrë tjetër në Komunë – është asamblist në Kuvendin Komunal të Vitisë. Sikur kryetari, edhe Afrim Ramushi vjen nga LDK.

Se Ramushi kryen dy punë e kanë konfirmuar edhe nga kabineti i kryetarit të Komunës, Sokol Halitit.

“Shofer i kryetarit të Komunës së Vitisë është Afrim Ramushi. Është e vërtetë që është asamblist i LDK-së”, thuhet në përgjigjen e kabinetit të kryetarit Haliti për Kallxo.

Nga kabineti i të parit të Vitisë thonë se janë në pritje të përgjigjes së MAPL-së për këtë çështje.

“Kryesuesi i Kuvendit ka dërguar kërkesën në MAPL për konsultim ligjor për Afrim Ramushin dhe po presim përgjigjen zyrtare të tyre”, i kanë thënë Kallxo nga kabineti i kryetarit Haliti.

Kallxo i ka shkruar edhe Ministrisë së Administrimit dhe Pushtetit Lokal për të parë se qysh përcaktohet me ligj, nëse mund të jetë edhe shofer i kryetarit të Komunës edhe asamblist.

Nga MAPL i kanë thënë Kallxo se në lidhje me çështje të tilla është një kërkesë e tyre që u është dërguar Agjencisë Kundër Korrupsionit dhe janë në pritje të opinionit të tyre.

“Meqenëse legjislacioni në fuqi për këtë kategori të të punësuarve në kabinetin e kryetarit nuk e rregullon, atëherë MAPL ka përgatitur një shkresë ku i është drejtuar Agjencionit Kundër Korrupsion për sqarim ligjor meqenëse AKK, është përgjegjës për implementimin e Ligjit Nr. 04/L-051 për Parandalimin e  Konflikt të Interesit në Ushtrimin e Funksionit Publik, ku deri më tani ende nuk kemi marr përgjigje”, thuhet në përgjigjen e MAPL-së..

Ndërsa kryetari i Komunës, Sokol Haliti, tha për Kallxo se Afrim Ramushin e ka shofer që nga 2014.

Ai e ka konfirmuar se i janë drejtuar Ministrisë së Administrimit dhe Pushtetit Lokal pas interesimit tonë.

Kryetari Haliti tha për se do ta respektojë vendimin e MAPL-së.

Ndërsa vet shoferi i kryetarit dhe asamblisti, Afrim Ramushi tha për Kallxo se Ligji i punës ia lejon si dhe thotë që ma mirë se çdo këshilltar tjetër e sheh situatës pasi që është në rrjedha.

“Unë shofer kam qenë prej 2014 e në këto zgjedhje kam kandidu edhe kam fitu, Ligji i punës po e lejon. Unë hala ma mirë se çdo këshilltar tjetër mundem me pas situatën se ku është mirë e ku nuk është mirë, se jam në rrjedha qaty. Fillimisht kryetari është i sinqertë, por nëse është nevoja edhe unë do të jem i sinqertë”, tha Afrim Ramushi.

commentFirst article
Sot mund të lexoni Shfletoni kopertinat