Në takim ministrja Reshitaj duke cilësuar Deçanin si një vend turistik prezantoi projektet e ministrisë që do të realizohen në bashkëpunim me komunën si ndërtimi i kanalizimit në fshatin Irzniq në Lagjen “Mushkolaj”, në vlerë 100 mijë euro, rregullimi i shtratit të Lumëbardhit në Deçan, në vlerë prej 500 mijë eurosh, ndërtimi i ujësjellësit në Strellc të Deçanit, në vlerë prej 320 mijë eurosh.
Reshitaj përmendi edhe projektet që janë duke vazhduar si: ndërtimi i kanalizimit në Deçan, në vlerë prej 60 mijë eurosh, rregullimi i hapësirës gjelbëruese tek Verrat e Llukës, në vlerë prej 50 mijë eurosh si dhe ujësjellësi për 10 fshatra dhe kyçja në burime të reja në Deçan, ku për vitin 2018 janë ndarë 50 mijë euro.
Nga ana tjetër kryetari Ramosaj falënderoi ministren për ndihmën e dhënë në realizimin e këtyre projekteve, duke vlerësuar punën e saj në përmirësimin e gjendjes se mjedisit dhe përkrahjes që ajo po i jep komunave.
Palët u zotuan që bashkërisht do t’i eliminojnë deponitë ilegale të mbeturinave në këtë komunë, si dhe shndërrimin e tyre në zona të gjelbra.
