Një 17-vjeçar shqiptar ka humbur jetën pas një aksidenti të ndodhur dje në Itali. I riu shqiptar, i identifikuar si Armando Bali, me banim në Trelizzi, ka ndërruar jetë mëngjesin e sotëm pasi nuk u mbijetoi dot plagëve të aksidentit tragjik.
Bashkë me të gjeti vdekjen edhe Xhuzepe De Shiriko, bashkëmoshatari i tij italian. Dy të rinjtë, miq me njëri-tjetrin, po udhëtonin me një motor që u përplas nga një makine tip “Pezho”.
I riu italian gjeti vdekjen e menjëhershme në vendngjarje, ndërkohë që shqiptari mbylli sytë disa orë më vonë në sallën e reanimacionit. Mediat italiane raportojnë se i ndjeri, Armando, ishte i apasionuar me volejbollin, një djalë i qetë që rrezatonte lumturi.
