Policia e Vlorës kishte marrë informacione se dy të rinj ishin duke transportuar një sasi kanabisi dhe i ka ndjekur ata me makinë në rrugën Kotë-Drashovicë. Gjatë ndjekjes, trafikantët e kanë shtuar shpejtësinë dhe nuk i janë përgjigjur urdhrit të policisë që të ndalonin.
Makina e tyre ka ikur me shpejtësi drejt Drashovicës ku ata kanë ndaluar dhe e kanë braktisur makinën Fuoristradë Toyota dhe janë futur në pyll.
Policia i ka ndjekur dhe ka arritur të kapë njerin prej tyre, Kleant Xhaka, 22 vjeç, lindur në Lushnje, me banim në Dhërmi, kurse personin tjetër vetëm sa ka mundur ta identifikojë.
Policia e Vlorës njoftoi se nga kontrolli që i është bërë "Fuoristradë-Toyota" me targë N856JLY, është gjetur një sasi prej 75 kg kanabis, e futur në thasë sintetikë, qese plastike të zeza si dhe një pjesë tjetër, mbështjellë me natriban, e cila u sekuestrua.
Tashmë po punohet për kapjen e bashkëpuntorit tjetër si dhe të personave të tjerë të implikuar në veprimtarinë e prodhimit dhe të shitjes së lëndëve narkotikëve.