Tridhjetë vite burgim është dënimi që prokurori i Velletrit në Itali, ka kërkuar mëngjesin e djeshëm në gjykatë për shqiptarin Lorenc Prifti.
Ky i fundit akuzohet si vrasësi i Francesco Maria Pennacchi.
Ngjarja ka ndodhur më 26 tetor të vitit të shkuar, ditë në të cilën kontabilisti italian u vra nga një goditje me thikë në bark, nga 44-vjeçari shqiptar, i cili jetonte në pallatin ku ndodhej edhe studio e punës së italianit.
Bukëpjekësi shqiptar ishte duke pushuar me familjen në apartamentin ku jetonte në Velletri, kur gjatë orëve të vona të natës, në studion ngjitur të italianit ishte duke u zhvilluar një festë e zhurmshme.
Kështu, 44-vjeçari shkoi në studion e italianit për të kërkuar shpjegime. Mes autorit dhe viktimës ka pasur lindur një konflikt që ka përfunduar me goditjen me thikë të Pennacchi-t. Gjatë ngjarjes, ishin të pranishëm edhe dy miq të italianit.