Një 49-vjeçar shqiptar është arrestuar pasditen e djeshme nga efektivë të policisë italiane, që kanë arritur të sekuestrojnë një sasi prej 40 kg drogë të llojit marijuhanë.
Teksa patrullonin në zonën mes Taranto-s e San Giorgio-s agjentët vunë re prezencën e një makinë të dyshimtë, raportojnë mediat italiane. Nën drejtimin e automjetit ishte 49-vjeçari shqiptar, identiteti i të cilit nuk bëhet i ditur nga mediat lokale, që shkruajnë se gjatë kontrollit, ai shfaqi shenja nervozizmi.
Kështu, efektivët vijuan kontrollin e mëtejshëm të mjetit. Në brendësi të bagazhit të makinës, u gjet sasia e drogës e ndarë në 11 paketime, të mbështjella me celofan dhe shirit ngjitës.
Droga u sekuestrua dhe shqiptari u arrestua, e më pas u dërgua në paraburgim.
Ndërkaq, hetimet vijojnë për të zbuluar burimin dhe destinacionin e drogës.
