Policia e Vlorës gjatë një operacioni ditën e sotme ka bërë të mundur arrestimin e një 63-vjeçari, i cili ishte shpallur në kërkim pasi kishte përshtatur një ambient për kultivimin e bimëve narkotike në garazhin e apartamentit.
Në pranga mësohet se është vënë Astrit Miftari, 63 vjeç, banues në Vlorë, i cili akuzohet nga policia për veprat penale "Prodhimi dhe shitja e lëndëve narkotike", "Kultivimi i bimëve narkotike" dhe "Vjedhja e energjisë elektrike ose impulseve telefonike".
Ngjarja
Më datë 29.04.2017, gjatë kontrollit të ushtruar në një apartament në lagjen "1 Maji", shërbimet kanë konstatuar në garazhin e këtij objekti një ambient të përshtatur për kultivimin e bimëve narkotike nëpërmjet llampave elektrike, një mjet lundrues "Gomone", si dhe sasi bimore narkotike, bazë materiale të ndryshme etj.
Ndalimi i këtij shtetasi u bë pasi Gjykata e Shkallës së Parë Vlorë, me vendimin nr.171 datë 28.05.2017, i ka caktuar këtij shtetasi masën e sigurisë "Arrest në burg".