Policia e Elbasanit ka sekuestruar një arsenal armësh, municione luftarake dhe vlera monetare. Sekuestrimi u bë në kuadër të operacionit “Dinamo” ku u arrestua edhe 62-vjeçari Engjëll. H.
“Arrestimi i tij, u bë pasi gjatë kontrollit të ushtruar në banesën e tij, i janë gjetur dhe sekuestruar arsenal armësh, municione luftarake dhe vlera monetare. Ky shtetas dyshohet të ketë patur për qëllim trafikimin e armëve dhe municineve luftarake në vlera të ndryshme monetare”,sqaroi policia.
Grupi hetimor i ka gjetur dhe sekuestruar në cilësinë e provës materiale: Një armë zjarri automatik, model 56, kalibër 7.62 mm, me krëhër të vendosur në të me 29 copë fishekë. Një armë zjarri pushkë model 63, kalibër 7.62 mm, me krëhër të vendosur në të me 25 copë fishekë. Një pushkë sportive shul, me krëhër të vendosur në të me 3 copë fishekë. 131 copë kartmonedha me prerje 1000 lekë (131000 lekë të reja). 6 kuti me fishekë model 54, kalibër 7.62 mm, me nga 100 copë fishekë secila. 45 copë fishekë pushkë sportive. 30 copë fishekë model 56, kalibër 7.62 mm. 173 copë fishekë model 54, kalibër 7.62 mm. Një armë e ftohtë thikë. Dy aparate telefoni të markave të ndryshme
Operacioni u zhvillua nga Specialistët e Seksionit për Hetimin e Trafiqeve të Paligjshme, në Drejtorinë Vendore të Policisë Elbasan, në bashkëpunim me Prokurorinë e Rrethit Gjyqësor Elbasan në kuadër të një hetimi të ndjekur me metoda speciale.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën, “Prodhimi dhe mbajtja pa leje e armëve luftarake dhe e municionit”, “Trafikimi i armëve dhe i municionit” dhe “Prodhimi dhe mbajtja pa leje e armëve të ftohta”, parashikuar nga nenet 278, 278/a, dhe 279 të Kodit Penal.
