“Arrest me burg” është masa e sigurisë e dhënë nga Gjykata e Tiranës për dygrabitësit e kasafortës së hotelit në kryeqytet, ku ndodheshin ora “Rolex” dhe bizhuteri të shtrenjta.
Ata janë Eduard Ngota, 32 vjeç dhe Zenel Dama, 27 vjeç. Ndërkohë në kërkim është shpallur një grua, Raimonda Bruçi e cila punonte si pastruese në hotelin ku u vodh kasaforta.
Ajo është motra e Eduart Ngotës dhe dyshohet se ka kurdisur vjedhjen e kasafortës me sendet me vlerë që ishin brenda plus 9500 eurove.
OPERACIONI “ROLEXI”
Me një operacion të shpejtë, të koduar ‘Rolexi”, sektori i Krimeve të Rënda dhe Komisariatin Nr.4 Tiranë kanë arritur të zbulojnë autorët e një grabitjeje me vlera të mëdha. Bëhet fjalë për një kasafortë me ora luksoze dhe bizhuteri të shtrenjta, përveç vlerave monetare, rrëmbyer në një godinë në rrugën e Dibrës më 15 gusht 2017.
Të arrestuarit janë: Eduart Ngota, 32 vjeç, banues në Tiranë, i dënuar më parë dhe Zenel Dama, 27 vjeç banues në Tiranë. Krahas tyre është shpallur në kërkim bashkëpunëtorja R. B., 36 vjeçe
Arrestimi ndodhi pasi është arritur të dokumentohet me prova ligjore, autorësia e ngjarjes së ndodhur më datë 15.08.2017 , ku këta shtetas në bashkëpunim me njëri- tjetrin kanë vjedhur një kasafortë, në një ndërtesë në rrugën e “Dibrës”.
Janë sekuestruar sendet që ndodheshin në kasafortën e vjedhur:
9 500 (nëntë mijë e pesëqind) euro
Një orë Roleks Day-Data me ngjyrë gri metalizato
Një orë Roleks Day-Data me ngjyrë floriri
Një orë Jaeger Lecoultre, me ngjyrë floriri
Tre byzylyk floriri. – Një varëse floriri
Një automjet i tipit “Fiat Punto”, i cili ka shërbyer për transportimin e kasafortës dhe largimin e autorëve nga vendi i ngjarjes.
Gjithashtu është shpallur në kërkim shtetasja R.B., 36 vjeçe, banuese në Tiranë. Materialet do t’i referohen Prokurorisë Pranë Gjykatës së Shkallës së Parë Tiranë, në ngarkim të shtetasve të lartëpërmendur, për veprën penale “Vjedhje e kryer në bashkëpunim”, parashikuar nga nenet 134/3 dhe 25 të Kodit Penal.
