Me anë të një komunikate policia ka treguar se si ndodhi vdekja e një punëtori në punishten e Bechtel-Enkas.
Policia e Rajonit të Ferizajt në një komunikatë dha detaje se si ndodhi vdekja e një punëtori sot në mëngjes në punishten e Bechtel-Enkas.
Policia konstatoi se pakujdesia e një shoferi të kamionit shkaktoi këtë vdekje.
“Rasti ka ndodhur në punishten e autosradës në afërsi të fshatit Kovaqec, ku sipas raporteve të para, ngasësi i automjetit transportues me targa lokale M.S.nga pakujdesia me rrotat e mbrapme godet këmbësorin –punëtorin T.T. i cili pëson lëndime serioze”, thuhet në komunikatën e policisë.
Sipas policisë në vendin e ngjarjes ka dalë dhe mjeku kujdestar, i cili ka konstatuar se viktima nga lëndimet e pësuara ka vdekur.
Me urdhër të prokurorit trupi i pajetë i të vdekurit është dërguar në Institutin e Mjekësisë Ligjore për obduksion, ndërsa të dyshuarit për vdekjen e punëtorit i është caktuar ndalimi policor prej 48 orësh.
Kallxo shkroi sot për vdekjen e një punëtori gjatë ndërtimit të Autostradës “Arbën Xhaferi”.
Familjen e të vdekurit e ngushëlloi edhe ministri Pal Lekaj.