Një 66-vjeçar italian ka humbur jetën në Spitalin Rajonal të Vlorës. Viktima është Vittorio Canali, ndërsa gruaja e tij ka fajësuar mjekët për këtë ngjarje, duke bërë edhe kallëzim penal.
"Shtetasia E.R., ka bërë kallëzim penal pranë strukturave policore Vlorë pasi pretendon se më datë 18.01.2018, bashkëshorti i saj shtetasi V.C., 66 vjeç, ka ndëruar jetë në repartin e reanimacionit të Spitalit Rajonal Vlorë, si pasojë e mjekimit të pakujdesshëm prej stafit mjekësor", sqaron policia.
Për këtë rast policia e Vlorës ka referuar materialet hetimore në Prokurorinë e Rrethit Gjyqësor, Vlorë, për veprën penale ''Mjekimi i pakujdesshëm'', të parashikuar nga neni 96 i Kodit Penal.
Nga ana e Specialistëve të Seksionit për Hetimin e Krimeve në Komisariatin e Policisë Vlorë janë ndërmarë veprimet hetimore të sekuestrimit të kartelës mjekësore të shtetasit V.C., dhe është dërguar trupi në Institutin e Mjekësisë ligjore Tiranë, për kryerjen e ekspertizës mjeko-ligjore dhe përcaktimin e shkakut të vdekjes.
