Inspektoriati i Mbrojtjes së Territorit Vendor pranë Bashkisë Kukës ka nisur inspektimet në terren për evidentimin e ndërtimeve pa leje në qytetin e Kukësit, në funksion të lirimit të hapësirave publike. Kontrollet janë përqëndruar në tregun e qytetit ku ndodhen një numër i madh i bizneseve .
Kreu i IMTV, Rrahman Dema, shpjegoi se në ditët në vijim, aksioni do vijojë me disiplinimin e tregut dhe lirimin e trotuareve nga tezgat.
“Aksioni do të vijojë në të gjithë bashkinë e Kukësit, deri në objektin e fundit” tha ai.
Gjatë inspektimit u bllokuan disa objekte që rezultonin pa asnjë dokumentacion, ndërsa iu la pronarëve kohë për largimin e tyre në mënyrë vullnetare. Ky inspektim do të vazhdojë në të gjitha njësitë administrative të Bashkisë Kukës.