Vallja - kurorë dafine
për dhjetë shqiponja mali,
dhjetë tufa trëndeline,
lum Tërbaç, kush ia fali!
Janë vajzat e Tërbaçit,
Si shtojzovalle të këngës,
Kënga, kaluar ilaçit,
Flori shpirti, mjalt i zemrës.
Për këngën - dy labe zonja,
Nuse si lulet në baçe,
Bashkë me tetë shqiponja,
Porsi dhjetë Miro Tërbaçe.
Në këngë porsi thëllëza,
Në valle porsi shqiponja,
Mbushur diell ato rrëza,
Bekim i nënave tona.
Vlorë, e mërkurë, 18. 01. 2017