Sh.K.A. “Agimi” vazhdon me traditën e koncerteve për nder të Ditës së Flamurit - 28 Nëntorit.
Njoftimi i Sh.K.A. “Agimi”:
ShKA Agimi ka kënaqësinë të njoftojë publikun për organizimin e koncertit tradicional kushtuar 28 Nëntorit, Ditës së Flamurit. Veçantia e koncertit të sivjetëm për Ditën e Flamurit është rikthimi pas shumë vitesh i emrave të njohur në reportorin e Agimit. Koncerti vjen me një program shumë cilësor, me performansë të korit nën udhëheqjen e Fikrim Emrës, oktetit nën udhëheqjen e Besim Berishës, orkestrës nën udhëheqjen e Kastriot Markut, grupit të valltarëve nën udhëheqjen e Luljeta Brahës dhe Blerim Gashit dhe valltarëve veteranë nën udhëheqjen e Mazllum Karamanit. Një numër solistësh, emra të njohur të artit në Kosovë do të jenë gjithashtu pjesë e programit të koncertit, i cili mbahet me 26 Nëntor në Shtëpinë e Kulturës në Prizren dhe fillon në orën 19.30.
Koncerti për nder të DItës së Flamurit është vazhdimësi e protestës artistike të anëtarëve të përkushtuar të ShKA Agimit. Rezistenca e anëtarëve do të vazhdojë në formën e protestës artistike, gjithnjë me synimin që Agimi të kthehet në piadestalin e veprimtarisë dhe namit të vet, si Shoqëri që i bën bashkë të gjithë personat që ia duan të mirën Prizrenit dhe kulturës. Kjo protestë do ta vazhdojë edhe tutje, derisa Agimi t’i kthehet të gjithëve, anëtarëve të vet, dashamirëve e përkrahësve dhe gjithë qytetarëve.
