Koha e keqe por edhe mungesa e rrymës kanë vështirësuar situatën në qendrën pranuese për refugjatë në Preshevë, të cilëve u duhen rroba dhe këpucë për kohë të ftoftë.
Siç ka thënë sekretari i Kryqit të Kuq në Preshevë Ahmet Halimi numër i madh i refugjatëve nga vendet e Lindjes së Mesme vazhdojnë të arrijnë në Preshevë.
“Situatën e ka vështirësuar shiu dhe mungesa e rrymës, të cilën nuk e kemi qe tri orë. Por po mundohemi t’u ndihmojmë. Mbrëmë kemi ndarë rreth 3 mijë racione ndërsa sot rreth 1500”, ka thënë Halimi për agjencinë serbe të lajmeve Tanjug.
Ai ka shtuar se refugjatëve u është siguruar kulm mbi kokë kur të arrijnë në Preshevë, ndihmë mjekësore dhe ushqim, por rrobat e tyre janë kryesisht të lagura nga shiu.
“Apeloj tek njerëzit që duan të dhurojnë rroba, t’i sjellin ato që janë për mot të ftoftë”, ka thënë Halimi.
