Zgjedhjet po i kërkojnë ata që duan të shpëtojnë nga arrestimet e Gjykatës Speciale.
Kështu vlerëson deputeti i Kuvendit të Kosovës nga LDK, Adem Salihaj, në një deklaratë të dhënë për Gazeta Blic. Sipas tij kërkesa e Kadri Veselit për zgjedhje nuk është aspak risi.
“Kadri Veseli është shumë i interesuar që të shkojë në zgjedhje, ai ka dalë me këtë ide që një vit, vetëm po mundohet të gjejë një pretekst. Gjithë këtë e bën me shpresë se mos po mbahen zgjedhjet para arrestimeve nga Gjykata Speciale, kështu të shtyhen arrestime dhe të ndodhë ndonjë mrekulli, e të shpëtojnë nga arrestimet” ka thënë Salihaj.Poashtu Salihaj tha që çështjen e demarkacionit Kadri Veseli e sheh vetëm si pretekst të përshtatshëm për të shkuar në zgjedhje.
“Kadri Veseli po e sheh demarkacionin si pretekst të përshtatshëm për zgjedhje,edhepse PDK kishte marrë qëndrim se për demarkacionin nevojitet konsensus. Por, qëndrimet e tij ndryshojnë varësisht prej disponimi” u shpreh Salihaj.
Kjo deklaratë e deputetit Salihaj vjen pasi që ditë më parë kryeparlamentari Kadri Veseli ka thënë që nëse nuk kalon demarkacioni zgjedhjet e parakohshme janë opsion.
E disponimin për të shkuar në zgjedhje e kanë edhe opozita ku ditë me parë Nisma për Kosovën ka inicuar mocionin e mosbesimit të Qeverisë së Kosovës, mirëpo që deri më tani nuk ka arritur që t’i mbledh 40 nënshkrime, të nevojshme, sa për të proceduar këtë mocion.