Ramush Haradinaj do të jetë kandidati i partisë, njerëzit e së cilës i ka akuzuar se si pjesë e SHIK-ut ia ka dëmtuar imazhin.
Kreu i AAK-së e ka fshirë vijën e kuqe, vetëm një javë pasi që siguroi të gjithë se me PDK-në nuk bënte dot koalicion para zgjedhjeve.
“Nuk bëjmë koalicion më këto dyja, në asnjë variant me PDK dhe LDK-në. Dhe është mirë që askush prej partive opozitare mos me bo me ta”, kishte thënë Haradinaj në pyetjen se cilat janë gjasat që AAK të nënshkruajë koalicion parazgjedhor me PDK-në.Pa bërë asnjë hap të fillimit të tij të ri, Kadri Veseli është ligështuar. Kreu i partisë më të madhe në vend, nuk ka guxuar të hyjë në zgjedhje me 6 parti të tjera të vogla, duke e zgjeruar koalicionin në plot 14, duke përfshirë AAK-në dhe Nismën.
Sipas tij, koalicionet parazgjedhore nuk duhet të bëhen, në mënyrë që t’u japin hapësirë qytetarëve të ndëshkojnë apo ta përkrahin lirshëm kandidatin e tyre.
“Lejoje qytetarin t’i ndëshkon lirshëm, mos t’ia përziejmë qytetarit gjykimin, për shkak se unë mendoj që qytetari e ka mundësinë kësaj radhe që për ato çfarë i kanë ndodhur gjithë këto vite, të paktën prej shpalljes së pavarësisë, me e gjyku dikën, qoftë me përkrahje qoftë me ndëshkim”, kishte thënë në mes tjerash Haradinaj.
Por Kadri Veseli e ka dorëzuar pa e marrë postin e kryeministrit. E ka nominuar për udhëheqës ekzekutivi, Ramush Haradinjan.
Në zhvillime dramatike të para mesnatës, Haradinaj e ka pranuar të jetë kandidati i koalicionit të udhëhequr nga PDK, për të parin e qeverisë.
E gjithë kjo pas një historie të gjatë përplasjesh të Haradinajt me PDK-në dhe me njerëz që i apostrofonte, si të SHIK-ut.
Që në vitin 2013, Haradinaj e akuzonte këtë organizatë, që e udhëhiqte Kadri Veseli se kishte punuar për dëmtimin e imazhit të tij.
“Ka pasur një fushate hershme e denigrimit të integritetit tim. Një kohë këtë e ka ba SHIK-u me mënyrën më të organizuar, ndoshta edhe oponent të tjerë.”
Përplasjet e Haradinajt me PDK-në vazhduan edhe kur ai e mori mandatin e deputetit në Kuvend. Në tetor 2015, pak pasi gjuajti gaz i kërkoi Veselit t’i kapë ata që i quajti ‘horrat’ e tij dhe të largohej nga Kuvendi.
“Kapi këta horra kryetar e qu nga këtu”.
Dy ditë para se të lirohej nga Franca, i tha KTV-së se nuk bënte koalicion parazgjedhor me PDK-në, me asnjë kusht.
Pohim të cilin e përsëriti fuqishëm në ditën kur doli i suksesshëm mocioni i nisur nga partneri i tij, Nisma.
Një javë më pas, Haradinaj u bë partner me ata që i kundërshtoi fuqishëm për 3 vjet, për të përmbushur ambicien e tij të madhe – për ta udhëhequr qeverinë, me cilindo kusht.
