Vdekje e dyshimtë po cilësohet rasti i Art Kurtit. Prokuroria nuk përjashton mundësinë që ish aktori i “O Sa Mirë” të jetë vrarë. Të enjten, Policia dhe Prokuroria në Gjakovë, por edhe të afërmit e zyrtarit komunal kanë qenë të rezervuar, për të mos thënë të izoluar, për të komunikuar rreth rastit që shokoi qytetin.
Policia në Gjakovë dhe Prokuroria Themelore kanë dyshime të ndryshme për rastin e 23 vjecarit që u gjet i vrarë me një plumb, para tre ditësh, në një veturë, në fshatin Goden, në zonën kufitare me Shqipërinë.
Derisa versioni zyrtar i policisë, qysh në ditën kur u gjet i vdekur ish-këshilltari për rini i kryetarit të Gjakovës, vazhdon të jetë se Art Kurti bëri vetëvrasje, Prokuroria nuk përjashton pistën e vrasjes së ish-aktorit.
Përkundër kësaj, Prokuroria zyrtarisht deri më tash ka intervistuar vetëm një person në lidhje me rastin. I intervistuari ka qenë B.O., pronari i veturës në të cilën u gjet i vdekur zyrtari i komunës së Gjakovës.
Zyrtarisht të enjten nuk pranuar të flasë kryeprokurori gjakovar Ali Selimaj. Me arsyetimin se hetimi në këtë fazë është i ndjeshëm, dhe siç thotë ai çdo spekulim i mundshëm rreth rastit dëmton rrjedhën e hetimit.
Megjithatë, në Prokurori Themelore të Gjakovës, kanë treguar se të enjten kanë marrë një rezultat preliminar të autopsisë së të riut që u bë i njohur për rolin e “Ylberit” në serialin “O Sa Mirë”.
Raporti thotë se plumbi Art Kurtin e ka goditur në pjesën e djathtë të kokës. Në po këtë anë të trupit të pajetë, është gjetur edhe një revole, e cila vazhdon të mos dihet se e kujt ka qenë, e më të cilën dyshohet se u krye vrasja.
Gjatë ditëve në vazhdim, prokuroria pret që t’i marrë rezultatet nëse plumbi që shpoi anë e për tej kokën e artistit gjakovar korrespondon me gëzhojën që u gjet në veturë dhe me pistoletën më të cilinën u krye vrasja, që dyshohet se ndodhi të hënën pasdite, përkundër se u zbulua një ditë më pas.
Nga ana tjetër, Policia në Gjakovë, në bazë të skenës së krimit dyshimet e rastit i ka drejtuar kah vetëvrasja.
Po ashtu, hetuesit policorë në Gjakovë, siç merr vesh media kanë pranuar edhe informacione se viktima së fundi kishte shfaqur shenja depresive. Art Kurti, sipas këtyre burimeve, ishte po ashtu i zhytur në borxhe tek disa persona të ndryshëm, kryesisht miq të tij, si shkas i shprehive të tij në lojëra të fatit dhe narkomani.
Megjithatë, raporti i obduksionit ka rezultuar se në momentin kur vdiq ish-aktori nuk ka qenë në ndikim të ndonjë droge. Dilema rreth këtyre dyshimeve mund të zbardhë edhe ekzaminimi i telefonit të ish-kandidatit për asamble komunale, në zgjedhjet e fundit në Gjakovë.
As Policia në Gjakovë, të enjten, nuk janë prononcuar zyrtarisht. Sikurse, Policia e Prokuroria, një ditë pasi Art Kurti u varros në varrezat e shehlerëve në Gjakovë, të izoluar për komunikim me gazetën kanë janë treguar edhe njerëz të afërm të ish-aktorit të ri.
E i vetmi i intervistuar deri më tash, B.O., nga Gjakova, shok i vëllait të viktimës, ka thënë se veturën e tij, brenda së cilës u gjet i vrarë ish-këshilltari i kryetari të Gjakovës Adrian Gjini, ai ia ka huazuar Kurtit të hënën rreth orës 17:00.
Nga ai moment, sipas deklaratës së tij, më nuk kanë pasur kontakt me aktorin tashmë të vdekur, deri në momentin kur një ditë më pas është informuar nga policia se vetura e tij është shndërruar në skenë krimi.
Trupi i pajetë i Art Kurtit u gjet të martën rreth orës 7 e 50 të mëngjesit, në fshatin Goden të Gjakovës.
Viktima, që përveç një roli të suksesshëm në një serial të njohur në Kosovë, pas vetes la edhe shumë dyshime për vdekjen e tij, u varros të mërkurën pasdite në tyrben e “Sheh Fetahu-t” në Gjakovë.
Lamtumir Artit i thanë edhe në një mbledhje komemorative që u organizua nga Komuna e Gjakovës në Pallatin e Kulturës “Asim Vokshi” dje në ora 15:30.
