Presidenti i Qipros, Nikos Anastasijadis, deklaroi sot se derisa të mbetet në fuqi Rezoluta 1244, për vendin e tij pavarësia e Kosovës do të jetë ‘e paligjshme’.
Ai gjatë një takimi në Beograd me homologun e tij serb Aleksandar Vuçiq tha se vendi i tij nuk do ta njohë Kosovën.
“Ju keni mbështetjen tonë të fuqishme për integritetin territorial të Serbisë. Qipro nuk e njeh pavarësinë e shpallur njëanshëm nga Kosova derisa Rezoluta 1244 është në fuqi," tha presidenti i Qipros, njëra nga pesë vendet e BE-së që vazhdon të mos njohë realitetin e ri të krijuar në Kosovë, e cila është njohur nga më shumë se 110 vende të botës.
Ai ka shtuar se derisa rezoluta e KS e OKB-së të jetë në fuqi “pavarësia e Kosovës do të jetë e paligjshme”.
Ndërsa, presidenti Vuçiq deklaroi se me Serbinë askush nuk mund të bisedojë me gjuhën e ultimatumeve dhe kërcënimeve.
