Është bërë më shumë se 1 muaj prej se kanë dalë rezultatet për konkursin për 10 zyrtarë ligjorë në Gjykatën e Apelit, por kandidatët e suksesshëm ende nuk kanë filluar punën, shkaku i ankesave.
Sipas Arbër Jasharit, zëdhënës në këtë gjykatë, janë tri ankesa të cilat janë duke u shqyrtuar nga komisioni.
Megjithatë, nga burime të KTV-së, është bërë e ditur se disa prej kandidatëve të suksesshëm, janë të afërm të zyrtarëve të lartë të institucioneve të drejtësisë.
E para në listën e kandidatëve të suksesshëm, ka dalë Greta Ibraj, që siç është konfirmuar, ka qenë praktikante në Gjykatën e Apelit për një vit.
KTV-ja, në drejtim të Gjykatës së Apelit, ka bërë pyetje për të konfirmuar nëse kryetari Hasan Shala, ka miqësi me babanë e kandidates, por nuk ka marrë një përgjigje për këtë çështje.
Në mesin e kandidatëve të suksesshëm, është edhe Vilson Maloku, djali i kryeprokurorit të Gjilanit, Jetish Maloku, por i cili ka mohuar të ketë pasur ndikim në proces.
KTV-ja ka kontaktuar edhe me kryetaren e Gjykatës Themelore të Prishtinës, Afërdita Bytyqi, për të konfirmuar nëse njëra nga kandidatet e suksesshme është mbesa e saj, por e cila nuk ka dashur të përgjigjet në pyetje, me arsyetimin se kjo çështje nuk lidhet me punën e saj si kryetare e Gjykatës Themelore të Prishtinës.
Në listën prej 10 kandidatëve, pretendohet se ka edhe të paktën 3 kandidatë që kanë lidhje me zyrtarë të lartë nga institucionet e drejtësisë, por me të cilët nuk është arritur të vihet në kontakt.
Në këtë konkurs, kishin konkurruar gjithsej 650 kandidatë.
