Lideri i Lidhjes Socialdemokrate dhe i opozitës maqedonase Zoran Zaev tha se partia e tij nuk ka qenë e konsultuar për vendimin e presidentit Gjorge Ivanov për faljen e të gjitha rasteve në lidhje me përgjimet e paligjshme.
“Kjo është befasi për ne”, deklaroi Zaev dhe paralajmëroi se drejtuesit e partisë sonte do ta shqyrtojnë vendimin e Ivanovit.
Presidenti maqedonas Ivanov, në një pres konferencë të jashtëzakonshme sot pasdite, ka informuar se ka marrë vendim për të nënshkruar abolicion për të gjithë politikanët për të cilët janë duke u zhvilluar hetime, si dhe për një politikan i cili po vuan dënimin me burg.
Vendimi i Ivanovit, të cilin shumëkush e quan vegël të partisë në pushtet, VMRO-DPMNE-se së Nikolla Gruevskit, vjen në një kohë kur Prokuroria Speciale Publike ka ngritur procedura për krime të ndryshme zgjedhore, skandale korruptive e krime të tjera, kundër funksionarëve të lartë të partisë së Gruevskit.
Ivanov, megjithëse s’i ka përmendur me emër, kuptohet se i ka amnistuar nga ndjekja penale ish-shefin e policisë sekrete, kushëririn e Gruevskit, Sasho Mijallkov, ish-ministren e policisë Gordana Jankullovska, ish-ministrin e transportit, Mile Janakievski, si dhe kryetarin e LSDM-së, Zoran Zaev, të gjithë këta ndaj të cilëve po zhvillohen procese gjyqësore. Por, tre të parët janë me akuza nga Prokuroria Speciale, ndërsa i katërti është me akuzë nga Gruevski. Ai që po falet, e që është në burg, është ish-ministri i brendshëm Ljube Boshkovski.
