Maqedonia ka rol të rëndësishëm si portier i rutës Ballkanike, por partitë e grindura dhe korrupsioni e pengojnë anëtarësimin në BE. Brexiti edhe më tepër mund ta hijezojë shpresën për BE, vlerëson Deutschlandfunk.
Duke dhënë një pasqyrë nga protestat në Shkup dhe duke theksuar se “Prokuroria speciale realizon hetime kundër funksionarëve të lartë të partisë në pushtet OBRM, rreth ish kryeministrit Gruevski“, autori Stephan Ozsváth, shkruan se në vend „duhet të mbahen zgjedhje të reja“, të cilat përpiqet ti ndërmjetësojë edhe diplomati gjerman Johannes Haindl.
„Por partitë në Maqedoni janë në grindje të tmerrshme. Termini për zgjedhjet e reja shkoi huq, datë të re nuk ka. Vendi Ballkanik është i ngarkuar edhe për shkak të rolit të saj të portierit të Evropës: këtu ndalon marshi i refugjatëve në shtegun e Ballkanit Perëndimor. Shpërblim për këtë deri më tani nuk ka. Greqia me vite e bllokon afrimin e Maqedonisë drejt BE dhe NATO, sepse vendi i vogël Ballkanik quhet njëjtë si provinca veriore greke“, thuhet në këtë reportazh.
Reportazhi i „Deutschlandfunk“ përfundon me vlerësimin e analistit Petar Arsovski se „me Brexit do të ritet skepticizmi ndaj BE të cilën e nxit qeveria“ dhe me deklaratën e ambasadorit evropian në Shkup, Aivo Orav, se bashkësia ndërkombëtare punon me të madhe dhe shpreson se „kriza në vend do të tejkalohet më së shpejti që është e mundur“.
