Partitë politike në Maqedoni parimisht arritën pajtim rreth përmbajtjes së të gjitha ligjeve që duhet të miratohen në kuvend si rezultat i Marrëveshjes politike të 20 korrikut.
Pas bisedimeve maratonë që u zhvilluan në Ministrinë e Drejtësisë, VMRO dhe LSDM konfirmuan se janë finalizuar të gjitha çështjet që kanë të bëjnë me mediat, Qeverinë kalimtare dhe Ministrinë e Brendshme.
Sipas përfaqësuesve politik, ligjet së shpejti do të gjenden përpara deputetëve për t’u miratuar në afatin e parashikuar me marrëveshjen e fundit politike.
Në bazë të Marrëveshjes politike, reformat në media parashikojnë formimin e një trupi rregullator i cili do të monitorojë mediat 100 ditë përpara zgjedhjeve.
Ky trup do të përbëhet nga 5 anëtarë. Secila parti do të propozojë nga një, ndërsa anëtari i pestë do të emërohet me konsensus nga të gjitha palët.