Ka dështuar takimi i liderëve, të partive opozitare i cili pritej të mbahet sot në ora 12 në Shkup, i thirrur nga lideri i Lëvizjes BESA, Bilall Kasami, pasi që në këtë takim nuk kanë ardhur lideri i LR – PDSH-së Ziadin Sela ai i partisë UNITETI Gëzim Ostreni dhe i RDK-së Vesel Memedi”.
Në këtë takim ishin vetëm përfaqësuesit e Lëvizjes BESA dhe pjesëtarët e shkëputur nga RDK-ja e Vesel Memedit, për këtë edhe takimi u anulua.
“Përgjegjësia për mosprezencën e UNITETIT dhe LR – PDSH-së, ngelet tek ata. Ne vazhdojmë të jemi të hapur për bashkëpunim”, kanë thënë nga Lëvizja BESA dhe pjesëtarët e shkëputur nga RDK-ja e Vesel Memedit.
Takimi i liderëve të partive opozitare shqiptare të cilët nuk janë pjesë e Parlamentit, sot duhej të mbahej me qëllim, sipas Kasamit, për të dhënë fillimisht frymën e bashkëpunimit, që pastaj do të rezultojë me komunikimin dhe dialogun e grupeve të punës, që ato të mund ta vazhdojnë procesin e bashkërendimit të aktiviteteve për arritjen e këtij synimi.
Portali rikujton se Sela ka pranuar që të takohet me liderët tjerë të opozitës shqiptare, me ftesë të Shoqatës së të Burgosurve dhe të Dëmtuarve Politik Shqiptarë, e cila ditë më parë e ftoi opozitën në takim me qëllim të komunikimit, bashkëpunimit dhe unifikimit të votës opozitare jashtëparlamentare të shqiptarëve.