Me promovimin e veprave të artistit të shquar shqiptar nga Maqedonia, Omer Kaleshi, në Institutin e Trashëgimisë Kulturore të Shqiptarëve, u rrumbullaksua shënimi i “Javës së Omer Kaleshit”, në Shkup.
Në prani të mysafirëve të shumtë, në hapjen e ekspozitës, në suaza të së cilës janë ekspozuar 24 veprat artistike, fjalim mbajti sekretari shtetëror në Ministrinë e Kulturës, Behixhudin Shehapi.
Ai theksoi se me krijimtarinë e tij, Omer Kaleshi i cili gjendet në majën e veprave artistike ndërkombëtare, arriti që t’i bashkojë civilizimet ballkanike.
Në këtë solemnitet fjalim mbajti edhe akademiku Luan Starova, i cili ka bërë retrospektivë për jetën dhe veprën artistike të artistit nga vendlindja e tij Kërçova, përmes Shkupit, Stambollit dhe Parisit.
Omer Kaleshi është nderuar edhe me medalje për merita për Maqedoninë, nga ana e presidentit të Maqedonisë Gjorge Ivanov.
