Postet e kryetarit të Parlamentit, Ministrinë e Financave, Ministrinë e Brendshme dhe drejtori të rëndësishme janë në pakon e ofertës së VMRO-DPMNE për BDI. Kjo bëhet e ditur për INA nga burime të partisë së Nikolla Gruevskit, të cilët theksojnë se janë të hapur për të biseduar për të gjitha postet e larta që kanë përgjegjësi dhe që për herë të parë mund të ulen kuadro të BDI-së. “Po jemi të hapur për të diskutuar për të gjitha çështjet. Por gjithçka është jozyrtare”, theksojnë.
Përveç kësaj është e hapur edhe çështja e diskutimit të pikave të platformës, sidomos për përdorimin e gjuhës shqipe, ku pranohet zgjerimi i përdorimit të saj, por sërish jo në nivel të shtetit. Edhe pikat e tjera të marrëveshjes janë të hapura, përveç Prokurorisë Speciale, për të cilën çështje VMRO-DPMNE nuk dëshiron të diskutojë dhe ti zgjatet mandati i saj për hetime. Dy partitë kanë dhënë sinjale se së shpejti do të nisin bisedimet, edhe ate gjatë kësaj javës, por duke mos dhënë detaje.
