Investimet e huaja në Maqedoni janë stabile edhe krahas krizës politike, kanë punësuar mbi 50 mijë persona dhe pothuaj asnjë prej kompanive deri më tani nuk është tërhequr nga vendi, vlerësoi sot kryetari i Këshillit të investitorëve të huaj (KIH) në kuadër të Odës ekonomike, Stefan Peter.
‘Kur flisni për pagat tek investitorët e huaj, nuk duhet të krahasoni mollë me dardhë, por mollë me mollë. Nuk duhet t’i krahasoni pagat në fabruika dhe ato në banka. Gjithashtu, shumë e rëndësishme është të shihet pasqyra e plotë, të shqyrtohen pagat në nivel vjetor se pse disa kompani e japin pagën e 13 dhe të 14, kurse disa sigurojnë benefite tjera’, theksoi Peter në konferencën për shtyp.
Ai vlerësoi se subvencionet për investitorët e huaj dhanë rezultate, kurse konfirmim për këtë, tha është fakti se janë siguruar 50 mijë punësime dhe se investimet e huaja viteve të fundit kanë kontribuar të zvogëlohet papunësia për rreth 10%.
Sipas tij, ka mungesë të kuadrove me përgatitje profesionale të mesme në pothuajse të gjithë sektorët. Prej 50 mijë të punësuarve nuk duhet të jenë të gjithë doktor shkencash. Duhet pasur edhe punëtorë të cilëve do t’u sigurohet pagë korrekte për jetë dinjitoze. Në të kundërt, do të mendojnë të largohen nga vendi.
