Oda Ekonomike e Maqedonisë Veri-Perëndimore sot ishte nikoqire e delegacionit të përbërë nga nxënës të shkollave të mesme dhe profesorë nga Belgjika (koordinatore e projektit), Gjermania, Spanja, Franca, Italia, Suedia, Hungaria dhe Maqedonia.
Ky aktivitet sot ishte në kuadër të programit të Bashkimit Evropian ‘Erasmus Plus’, i cili zbatohet që nga janari i vitit 2014 dhe është një program i udhëhequr nga Komisioni Evropian, i fokusuar në arsim, trajnim, rini dhe sport, njofton AIM.
Krytetari i OEMVP-së, Nebi Hoxha tha se programi në fjalë është një mundësi e shkëlqyer që do të kontribuojë në zhvillimin e të rinjve, që do të rezultojë me një konkurrencë dhe potencial më të madh si një bazë e mirë për zhvillimin e vendit.
Mbi format e punësimit të të rinjve, subvencionet që ofron shteti, trajnimet e ndryshme dhe sipërmarrësinë e të rinjve, prezantime realizuan Agjencioni për punësim i RM-së, Forumi edukativ rinor dhe Kariera.mk, kurse mbi mundësinë e punësimit dhe programet për përkrahje të të rinjve nga ana e kompanive, prezantuan kompanitë Dauti Komerc dhe Benton Ni.
