OSBE-ODIHR prezantoi raportin paraprak të zgjedhjeve lokale të mbajtura më 15 tetor në Maqedoni.
Konstatimet e para janë se gjatë fushatës zgjedhore dhe ditës së votimit janë bërë shkelje të vogla, por që nuk kanë rezikuar procesin zgjedhor. Ambasadorja e OSBE-ODIHR-së Audrej Glover theksoi se zgjedhjet e të dielës dëshmuan një përparim demokratik të vendit.
"Edhe pse procesi akoma nuk ka përfunduar, në këto zgjedhje u pa përparimi demokratik i këtij vendi dhe u rrit besimi i votuesve në procesin zgjedhor. Shpresojmë se do të vazhdojë edhe në rrethin e dytë" deklaroi Audrej Glover, Ambasadore e OSBE-ODIHR-së në Maqedoni.
Nga ana tjetër shefi i Delegacionit të Kongresit të autoriteteve lokale dhe rajonale të Këshillit të Evropës, Karim Van Overmeire ka vlerësuar se zgjedhjet e 15 tetorit plotësojnë standardet ndërkombëtare, por gjithnjë duke pasur hapësirë përmirësimi.
"Në përgjithësi, zgjedhjet e djeshme lokale ishin në përputhje me standardet ndërkombëtare, dhe ne shpresojmë se kjo do të jetë kontribut për zhvillimin e mëtutjeshëm të qëndrueshëm në nivel lokal, me qëllim që të përmirësohem kushtet për jetesë për të gjithë qytetarët e këtij vendi" – tha Karim Van Overmeire, Kryetar i “The Congress” pran KE-së.
As Glover dhe as Van Overmeire nuk deshën të komentojnë akuzat e opozitës për parregullsi zgjedhore. Qëndrimi i tyre i përbashkët ishte se të gjitha ankesat do të merren parasysh, përfshi edhe ato të opozitës. Raporti për procesin zgjedhorë do të plotësohet ditëve në vijim.
