Kryetari i Komisionit Shtetëror të Zgjedhjeve në Maqedoni, Aleksandar Çiçakovski dhe dy anëtarë të tjerë të komisionit kanë njoftuar dorëheqjet nga posti.
Vendimi vjen pas një skandali që ka të bëjë me përvetësimin e një shume parash prej rreth dhjetë rrogave mesatare. Megjithëse anëtarët e KSHZ-së nuk kishin shkelur ligjin, vendimi për bonuset ishte marrë në mënyrë jotransparente, në një seancë të mbyllur.
Ambasadori amerikan Jess Baily para pak ditësh bëri të njohur skandalin. Kjo pasoi kritika nga mjetet e informimit në adresë të anëtarëve të KSHZ-së.
Zoti Çiçakovski më pas njoftoi se bonusin e tij ia dhuronte një organizate humanitare, por pas shtimit të kritikave ai bëri të ditur të hënën se jep dorëheqjen.
Edhe dy anëtarët e tjerë të propozuar nga Lidhja Social Demokrate në KSHZ, Violeta Duma dhe Igor Milev kanë dhënë dorëheqjet për shkaqe morale.
Ndërkaq, anëtarët e tjerë të komisionit nuk janë prononcuar. Dorëheqjet duhet t’i miratojë parlamenti me dy të tretat e votave. Vendimin e kryetarit dhe dy anëtarëve të dorëhequr e ka përshëndetur kryeministri maqedonas Zoran Zaev, duke i quajtur ata profesionistë dhe duke premtuar se “do të kujdeset për ta”.
“Duhet të ekzistojnë mekanizma për shpërblime, por për këtë duhet të vendosin institucionet të cilat i zgjedhin ata”, është shprehur Zaev të hënën.
Ky komision u miratua pas marrëveshjes politike të Përzhinës para më shumë se dy vjetësh ndërmjet katër partive, atëherë më të mëdhatë në vend. Komisioni me përbërjen aktuale realizoi dy palë zgjedhje, në dhjetor të vitit të kaluar dhe në tetor të këtij viti për të cilat vlerësimet ndërkombëtare ishin kryesisht pozitive, ndonëse nuk munguan vërejtjet ndaj KSHZ-së për lëshime teknike./voa
