Është zgjedhur pak momente më parë prokurori i ri publik me 61 vota ‘pro’.
Plot dy herë ka dështuar votimi për zgjedhjen e Prokurorit të ri publik për shkak të mungesës së kuorumit në Kuvend. Për këtë arsye është kërkuar një pushim prej 30 minutash nga kryetari i Kuvendit, Talat Xhaferi. Në Kuvend është vërejtur mungesa e liderit të Aleancës, Zijadin Selës dhe deputetit Surija Rashidi.
Në debatin e kaluar në Kuvend nuk morën pjesë deputetët e VMRO-DPMNE-së opozitare. Qeveria më 7 nëntor i propozoi Kuvendit për prokuror publik të Republikës së Maqedonisë të emërohet Lubomir Joveski, anëtar i Këshillit të prokurorëve publikë.
Në shpalljen që e publikoi Qeveria më 14 shtator, për prokuror publik shtetëror u paraqitën 23 kandidatë. Pas paraqitjes së kandidatëve, Këshilli i prokurorëve publikë, me kërkesë të Qeverisë, dorëzoi mendim të elaboruar në formë të shkruar për të gjithë kandidatët e paraqitur në shpallje që i përmbushin kushtet. Mendimi i Këshillit është obligues për Qeverinë, e cila kandidatët e propozuar i dorëzon në Kuvend.
Joveski 63-vjeçar në punën e tij të deritanishme ka punuar në sferën penale. Më shumë se 15 vite ka punuar si gjykatës nëpër lëndë penale, ndërsa në një mandat e ka udhëhequr Gjykatën Themelore Shkupi 2, ndërsa ka edhe përvojë pune prej mbi 12 vite si prokuror publik dhe shtatë vite në sferën e ekzekutimit të sanksioneve penale.