Në mungesë të çerdheve, shumë prindër detyrohen që të udhëtojnë me dhjetëra kilometra për të dërguar fëmijët e tyre në çerdhe. Shermine Fetahi, nga Haraçina, tregon për TV21, se dy fëmijët e saj më të mëdhenj kishin qëndruar në çerdhen “25 maji” në komunën e Gazi Babës, ndërsa fëmija i tretë nuk është pranuar, edhe pse kishte bërë kërkesë që nga muaji shkurt.
Nga komuna e Haraçinës thonë se kanë projekt, ndërsa fillimi i ndërtimit të çerdhes pritet të nisë në pranverë.
Një prej komunave që nuk ka çerdhe është edhe Zhelina. I pari i kësaj komune Blerim Sejdiu, është optimist se këtë vit do të nis ndërtimi i çerdhes. Ai ka ndarë edhe vendin për ndërtimin e çerdhes.
“Tani kemi aplikuar me një shpallje në ministrin e punës dhe politikës sociale. Mendojmë të paktën që këtë vit të kemi konstruksion të kësaj çerdhe. Ku është e pritur shumë kohë nga qytetarët, ku kemi 30 mijë banor dhe ende nuk ka çerdhe, dhe mendoj se jemi në fazën ku duhet të ndërtohet ajo çerdhe”, tha Kryetari i komunës së Zhelinës.
Kryetari i komunës së Sarajit Blerim Bexheti, kërkon paralele tjera, si dhe ndërtimin e një çerdhe në Kondov.
Edhe fëmijët e Studeniçanit nuk kanë çerdhe. Nga komuna thonë se kanë kërkuar disa herë fonde nga qeveria për ndërtimin e çerdhes, por deri tani nuk kanë marrë përgjigje pozitive.
