Oprah Winfrey ka rrëmbyer gjithë vëmendjen në ceremoninë e ndarjes së çmimeve, Golden Globes, që u zhvillua të dielën mbrëma na Los Angeles.
Fjalimi i moderatores së famshme është pëlqyer shumë, saqë shumëkush i ka sugjeruar që të kandidojë për presidente të Shteteve të Bashkuara të Amerikës.
Përveç përdoruesve të rrjeteve sociale, edhe shumë personazhe të njohura i kanë kërkuar 63-vjeçares që ta mendojë seriozisht kandidaturën për Shtëpinë e Bardhë.
Winfrey e pranoi çmimin ‘Cecil B. DeMille’ dhe me këtë rast mbajti një fjalim duke u thënë femrave të reja se një ditë e re është në horizont.
“Dua që sonte të shpreh mirënjohje për të gjitha femrat që kanë duruar vite abuzimi dhe sulmi, sepse ato, njësoj si nëna ime, kanë pasur fëmijë për të ushqyer dhe fatura për të paguar dhe ëndrra për të ndjekur”, është shprehur ajo.
Oprah ka thënë se për fjalimin e saj është frymëzuar nga të gjitha femrat që janë ndier aq të fuqishme saqë kanë dalë hapur për çështjen e abuzimeve seksuale dhe kanë folur për përjetimet e tyre.
Ajo ka kujtuar tregimin e Recy Taylor, një femre me ngjyrë, e cila në vitin 1944 ishte përdhunuar nga gjashtë meshkuj dhe askush nuk ishte dënuar.
Deklaratat e Winfreyt u pritën me entuziazëm dhe duartrokitje nga elita e Hollywoodit dhe me brohoritje që mbështesnin fjalët e saj.
“Dua që të gjitha femrat që po na shikojnë tash, ta dinë se një ditë e re është në horizont! Dhe kur ajo ditë të agojë, do të jetë për shkak të shumë femrave të mrekullueshme, shumë prej tyre janë këtu në këtë dhomë sonte, dhe disa meshkuj fenomenalë që luftojnë për të na çuar atje ku askush nuk do të duhet të thotë më kurrë: ‘Edhe unë'”, ishin fjalët e Oprah.
