“VIP Shpija” e sjellë Albana Osmanin në Kosovë

Moderatorja e njohur e programeve televizive në “Top Channel” do të prezantojë këtë edicion “Vip Shpija”, një nga spektaklet e ndjekura në Kosovë dhe Shqipëri, ku bëjnë “reality show” njerëz të famshëm. Spektakli që do të transmetohet edhe nëpërmjet plaftormës “Digitalb”. Së pari ishte planifikuar të prezantohej nga Jonida Vokshi, vajza e cila njihet edhe si imazh i kësaj platforme. Por nuk dihet pse planet kanë ndryshuar, dhe në vend të Jonidës do të jetë Albana ajo e cila nëpërmjet rrjeteve sociale ka shprehur lumturinë e saj për prezantimin e këtij formati, duke premtuar njëkohësisht edhe cilësi të lartë gjatë këtij edicioni. Albana do të shpërngulet kështu për të jetuar në Kosovë, pasi do t’i duhet të jetë e angazhuar me provat, njohjen me banorët e famshëm që do të hyjnë në bashkëjetesë me njëri-tjetrin dhe elementet e spektaklit.

Ndërkohë kanë mbetur vetëm pak ditë deri në startimin e këtij “reality show”, në këtë edicion të tretë. Mediat kosovare e kanë cilësuar këtë herë “e treta e vërteta” për “VIP Shpija”, duke komentuar se dy edicionet e kaluara, ndonëse të mbushura me personazhe të famshme kosovare, nuk arritën të sjellin suksesin e nevojshëm. Më tej, në këto portale thuhet se pritet që këtë edicion të ketë rritje të cilësisë dhe shikueshmërisë për faktin e ndryshimeve që janë bërë. Fillimisht ky format do të transmetohet në platformën “Digitalb” dhe “Ipko”.