Një gjykatë në SHBA e ka dënuar me 35 vite burg atë që njihet si trafikanti më i madh i kokainës në botë.
Daniel Barrera Barrera, i njohur edhe si ‘I çmenduri’ (El Loco), u dënua nga një gjykatë në Nju Jork me 35 vite burg dhe një gjobë prej 10 milionë dollarësh.
Gjykatësi e quajti trafikantin një njeri të zgjuar e të talentuar, që nga një fermer i thjeshtë u bë kreu i një organizate të dhunshme kriminale.
Duke folur në gjykatë, 48-vjeçari tha: “I kërkoj falje familjes sime për vuajtjet që i kam shkaktuar”.
El Loco konsiderohet si Pablo Escobar i ditëve moderne.
Kolumbiani ishte dënuar në vendin e tij në vitin 1990 për trafik kokaine, por u arratis nga burgu.
El Loco bëri operacion plastik për të fshehur identitetin e tij.
Po ashtu dogji shenjat e gishave, për të shmangur njohjen nga forcat e rendit.
