Me raportin në mes të etikës dhe politikës janë marr shumë studiues e teoreticient të rretheve të ndryshme ideologjike e shkencore. Rrjedha e qasjes tonë të të shtjelluarit të kësaj teme si pikënisje ka praktikat e të bërit politik me mungesë të theksuar të etikës. Politikanët shqiptar nuk është se nuk kanë lexuar asnjëherë për etikën, por që me praktiken e tyre po bëhen shkollë që etikën dhe politiken i ndajnë si dy fenomene krejtësisht të ndryshme e që faktikisht të dyja duhet të shkojnë bashkë për ta plotësuar njëra tjetrën.
Marrëdhënia e etikës dhe e politikës siç e thamë është çështje e shqyrtuar nga shumë teoreticient të shkencave politike e sociale në përgjithësi, mirëpo kjo çështje është shumë aktuale për kohën në të cilën po jetojmë, si në aspektin brenda-shtetëror por edhe në atë ndërkombëtar. Parimet të cilat i parashtron etika nuk po i merr në konsideratë politike e përkundrazi po demonizohet politika si fenomen pa etikë. Kjo gjë po bëhet aq irrituese sa dita-ditës opinioni i gjerë po i pranon tamam si fenomene të ndara që nuk kanë asgjë të përbashkët.
Këtu lindë pyetja a kanë vlerë parimet etike në politikë si në fushat tjera çofshin ato individuale ose kolektive të veprimit, ose mos ndoshta politika është diçka ndryshe? Nëse politika nuk është subjekt i parimeve etike dhe rregullave që i përfshijnë fushat tjera, atëherë politika qenka krejt jo etike, ose ndoshta ka një etikë dalluese të politikës! Neve na intereson çështja e raportit të etikës dhe politikës, e etikës patriotike, e gënjeshtrës në politik, e pa dëgjueshmërisë qytetare, e dhunës politike si edhe të etikës në marrëdhëniet ndërkombëtare.
Etika dhe politika – shumë do të thoshin që janë krejtësisht dy fenomene të ndryshme, e sidomos në hapësirat tona shqiptare, dhe kjo nga se që të dyja fenomenet po relativizohen dita – ditës. Fryma politike në vitet e fundit ndër këto hapësira e ka përkryer mendimin se këto dy fenomene nuk puqen mes veti. Është krijuar përshtypja se ka një etikë dalluese për politikën dhe se etika që e njohim botërisht si shkencë e të eksploruarit dhe të studiuarit të standardeve të moralit, kritereve themelore të të jetuarit me vlera morale, dallon nga etika e politikës. Ky është dëmi më i madh që në këto dy apo tre dekadat e fundit intensivisht po ia bënë politikës e të bërit politik, politikanët me sjelljet e tyre jo etike në politik. Politika po mendohet si zotësi e të vepruarit pa etikë e moral, pa standard vlerësimi, pa respekt ndaj normave fondamentale njerëzore. Kjo është baza nga e cila ka filluar të mendohet për etikën e politikës.
Si lëndë etika politika është pjesë kurikulës së çdo fakulteti të shkencave politike e edhe sociale në përgjithësi, por si e tillë në të njëjtat fakultete të hapësirës shqiptare nuk studiohet. Konfrom kësaj shkollën për këtë e luajnë politikanët që etikën vetëm e kanë dëgjuar dhe nuk e njohin në veprimtarin e tyre politike dhe si e tillë kjo “mësimdhënie” e tyre po pranohet si e pranuar ose se “kështu është politika, ajo nuk ka etikë”.
Politika e cila zhvillohet në hapësirën shqiptare ka nevojë për evolucion të vazhdueshëm, real dhe të qëndrueshëm në rivlerësimin, rinovimin dhe rindërtimin e saj mbi vlerat themelore që proklamon etika politike. Konstatimi se politika pa etikë është shpërdorim i politikës vije si pasojë e veprimeve jo etike në politikë. Definicioni i politikës si përgjegjëse ndaj problemeve të shoqërisë, të marrëdhënieve ndërmjet njerëzve për ndryshimin, duhet të jetë shtytësi kryesor i vënies së standardeve etike si parimi kryesor i funksionimit të politikës në shoqëri. Shteti e shoqëria jonë ka nevojë pa dallime ideologjike e politike, të reja apo të vjetra për veprime etike brenda politikës. Një politikë pa etikë, është mos vlerësim i vlerave kombëtare, shtetërore, moderne e tradicionale.
Nisur nga problemet shoqërisë së sotme, e sidomos ato ekonomike e financiare që e kanë tronditur botën, të vepruarit e të menduarit e politikës pa etikë, mbyt shpresën dhe vullnetin për të tentuar angazhimin për ndryshimin e çdo gjendjeje negative në shoqëri.
Në kuadër të këtij mendimi, mund të themi se të inkuadruarit e etikës në politikë është i domosdoshëm dhe i shumë kërkuar nga të gjitha shtresat shoqërore në hapësirën shqiptare dhe si e tillë etika dhe politika duhet të ngjiten fortë mes veti për të jetësuar, nëse asgjë tjetër, shpresën në një të ardhme të ndershme për vendin tonë.